Powěsće: wutoru, 21.01.2025

Spěchować na přichodne generacije wusměrjene wuwiće towaršnosće, demokratije a wobswěta je zaměr priwatneje Załožby za wnučkokmanosć ze sydłom w Njebjelčicach. Tuchwilu so poslednje formality za jeje załoženje spjelnja, w přichodnych tydźenjach ma dźěławosć zahajić. Bywši Njebjelčanski wjesnjanosta Tomaš Čornak je iniciator załožby. Mjez druhim chce so wona na spočatku wo renaturěrowanje rěki Jawora a podpěru za nadběhowanych lokalnych politikarjow starać. Załožba za wnučkokmanosć financuje so ze swójskeho kapitala, darow a spěchowanskich pjenjez.

W mnohich hornjołužiskich městach a gmejnach su lětsa psyče dawki zwyšili. Kaž wuchadźa z naprašowanja MDRa, stej Zhorjelc a Lubij komunje z najwyšim psyčim dawkom w Sakskej. Wobě žadatej sej za prěnjeho psa 102 euraj wob lěto. W serbskich a dwurěčnych gmejnach je psyči dawk porno tomu poměrnje niski. Najmjenje płaća z 20 eurami wob lěto wobsedźerjo psow w Bóšicach a Worklecach; najwjac žada sej Rakečanska gmejna z 55 eurami. Slěduja Njeswačidło a Radwor z 45 a gmejna Ralbicy-Róžant ze 40 eurami wob lěto. Wjace wo wysokosći psyčeho dawka w sakskich komunach zhoniće na stronach MDR-online.

Z kemšemi, nyšporom a procesionom po wsy kaž tež z přednoškom su wčera w Chróšćanskej wosadźe swjedźeń swj. Bosćana swjećili. Po nyšporje, na kóždolětnej hłownej zhromadźiznje bratstwa swj. Bosćana – cyrkwinskeho towarstwa w Chrósćicach – je Vincenc Böhmer wo swojich nazhonjenjach a dožiwjenjach jako dušepastyr w Kamjenskej chorowni swj. Jana přednošował. Na zhromadźiznje su tohorunja dweju noweju čłonow přiwzali. Chróšćanske bratstwo ma z tym 110 čłonow.

Wyši měšćanosća Budyšina, Zhorjelca a Wojerec kaž tež krajnej radaj Budyskeho a Zhorjelskeho wokrjesa žadaja sej naležnje, železnisku čaru Drježdźany – Budyšin – Zhorjelc elektrifikować. To wuchadźa z poziciskeje papjery, kotruž su mjenowani kónc tydźenja Sakskemu ministerskemu prezidentej Michaelej Kretschmerej přepodali. W spisu je rěč wo wuznamje Budyšina jako motor hospodarstwa we Łužicy a wo tym, podłu awtodróhi A4 k pólskej hranicy inowaciski koridor natwarić. Wobě stronje dojednaštej so na zetkanju na to, sej dalše wuwića a kročele wobeju projektow prawidłownje dorěčeć.

Něhdźe 1.200 wojakow zwjazkoweje wobory zwučuje wot póndźele na wojerskim zwučowanišću Hornja Łužica. W srjedźišću dźewjećdnjowskeho wojerskeho zwučowanja steji třělenje. Kaž zdźěli komandant wójska, su tež manewry z lětadłomaj Eurofighter a Tornado předwidźane. Tak móhła nad Hornjej Łužicu hdys a hdys tež hara lětadłow słyšeć być. Piloća pak dyrbja so po postajenjach měć a njesmědźa nad sydlišćemi lětać. Nimo toho njebudu wojacy kónc tydźenja třěleć.