Powěsće: srjedu, 22.01.2025

Sakski ministerski prezident Michael Kretschmer wita srjedu w statnej kencliji w Drježdźanach składnostnje ptačeho kwasa skupinje dźěći z Ćišćanskeje pěstowarnje "Lutki" a Serbskeho dźěćaceho towarstwa Ćisk. Dohromady 20 dźěći poda so za to do sakskeje stolicy, zo bychu tam nałožk ptačeho kwasa předstajili. W tradicionalnej drasće pokazaja dźěći tam ptačokwasny program ze spěwami, rejemi a basnjemi.

Beno Waurich z Jawory je dale předsyda chóra Lipa. Wón bu na hłownej zhromadźiznje wutoru znowa woleny. Městopředsydce stej Katka Baierowa a Melanie Bulankowa. Kaž chór Lipa zdźěli, mějesě towarstwo kónc lěta 71 čłonow, wot toho je 57 aktiwnych spěwarkow a spěwarjow. Jedyn z prěnich wjerškow lěta budźe nalětni koncert w Klóšterskej zahrodźe w Pančicach-Kukowje dnja 18. meje.

Dohromady 135 dźěćacych kubłanišćow wobdźěli so lětsa na sportowej olympiadźe pěstowarnjow wokrjesa Budyšin. To je pjeć pěstowarnjow wjace hač loni a telko kaž hišće ženje. Prěnje wubědźowanje je 11. měrca w Załomju. Sćěhuja wubědźowanja mjez druhim w Radworju, Rakecach, Kamjencu a Kulowje. Finale olympiady pěstowarnjow wotměje so kónc apryla w Budyšinje.

Prěnje koparske mustwo Sportoweje jednotki Chrósćicy hraje w štwórćfinalu wo wokrjesny pokal Zapadołužiskeho koparskeho zwjazka w Porchowje wo zaćah do połfinala. Dalše tři pokalne partije kónc měrca su Natwar Němske Pazlicy – Módro-běli Kulow, Póst Germania Budyšin – Sportowe zjednoćenstwo Großnaundorf a Załom-Wopaka přećiwo Rakečanskemu sportowemu towarstwu. Kónčne hry přewjedu so kónc meje a spočatk junija w Kulowje w rjedźe 100-lětneho wobstaća Módro-běłych Kulow.

Ratar, pčołar a kulturnik Jan Šołta z Konjec je njeboh. Wón zemrě wutoru w starobje 83 lět w chorowni w Drježdźanach. Po wjacorych dźěłowych stacijach we Wojerowskej kónčinje dźěłaše rodźeny Salowčan w Ralbičanskej prodrustwowej zamkarni a pozdźišo jako nawoda kormjernje swini. Po politiskim přewróće natwari Konječan Delanske rěznistwo w Ralbicach. W swojej pčólnicy “Regina” w Konjecach posrědkowaše Jan Šołta zajimowanym wědu wo pčołkach. 1971 je Jan Šołta Serbski muski chór Delany sobu załožił. W spěwnym cyłku je wón hač do smjerće aktiwnje sobu skutkował. Jeho wulka zasłužba je, zo je muski chór 2005 cejdejku wudał a zo ma cyłk wot lońšeho nowu chórowu drastu.