Powěsće: pjakt, 17.01.2025

Serbske młodźinske towarstwo Pawk planuje zhromadnje z Domowinu nowy format, z kotrymž chcedźa sej do młodźinskich cyłkow dojěć a wo prawicarskich strukturach, jich ideologiji kaž tež wo schowanych symbolach a drastach informować. To zdźěli předsydstwo Pawka štwórtk w nowinskej zdźělence. W tutej rozprawja wo prawicarskich problemach a antiserbskich šćuwanjach na šulach a zwonka šule. Wosebje w młodźinskich klubach, na swjedźenjach a tež w rumnosćach serbskeho internata w Budyšinje chce towarstwo projekt přewjesć. Nastał je tohorunja protokol sobustawow Pawka, w kotrymž su mjenowane hanjenja a antiserbske šćuwanja na serbskich šulach dokumentowane.

Na wupředatej žurli Němsko-Serbskeho ludoweho dźiwadła na hrodźe w Budyšinje je štwórtk młodźinske dźiwadło premjeru inscenacije "Pjeršćeń" předstajiło. Kruch wokoło powědki Nibelungow je Nižozemjan Theo Fransz napisał, režiser Měrko Brankačk je hru zeserbšćił. 120 přihladowarjow dožiwi dynamisku a modernu młodźinsku inscenaciju. Dźewjeć młodostnych žněješe po předstajenju sylny přiklesk publikuma. Přichodne předstajenje je spočatk februara.

Po tym zo je w Braniborskej pochroma (němsce: Maul- und Klauenseuche) wudyriła, weterinarnej zarjadaj w Hornjej Łužicy wuwiće dokładnje wobkedźbujetej. Pola wikowarjow a podobnych zawodow pruwuja, hač su tute w zašłych třoch tydźenjach skót z Braniborskeje dóstali, zdźěli Budyski krajnoradny zarjad. Podhlad na pochromu dyrbja plahowarjo skotu a skótni lěkarjo hnydom zarjadej přizjewić. Skótni lěkarjo měli při njejasnych wuslědkach proby za přepytowanje zapodać. Konkretne škitne naprawy pak móža zarjady hakle přikazać, jeli mrětwa w regionje wudyri, jeli na to tukaja abo jeli měješe plahowar tu kontakt k potrjechenemu zawodej.

Njeswačanske jěchanske towarstwo chce lětsa w Holešowskej Dubrawce znowa sakske mišterstwo w dresurje a skakanju wuhotować. Kaž rjekny zarjadowar, su loni na wšelakich blakach inwestowali, zo bychu hišće lěpše wuměnjenja za jěcharjow stworili. Po dobrym wothłosu hotuja so lětsa srjedź junija na sakske mišterstwa wšěch starobnych klasow w skakanju. Hnydom tydźeń pozdźišo přeprošuja aktiwnych potom na sakske mišterstwa w dresurje.

W kooperaciji z braniborskim ministerstwom za kubłanje, młodźinu a sport a Šulu za delnjoserbsku rěč zarjaduja so lětsa zaso kursy serbšćiny za započatkarjow. Poskitk měri so wosebje na kubłarki a kubłarjow. Wo tym pisa Nowy Casnik w aktualnym wudaću. Za kursy přizjewić móža so zajimcy z wokrjesow Hornje Błóta-Łužica, Sprjewja-Nysa, Dubja-Błóta a z města Choćebuz. Rěčne certifikaty wustaji potom Rěčny centrum WITAJ.