Powěsće: sobotu, 18.01.2025

Na Zelenym tydźenju w Berlinje prezentuja so wot tutoho tydźenja tež wjacore hornjołužiske zawody. Dźesać regionalnych poskićowarjow so na wikach hač do 24. januara wobdźěli - mjez druhim zawod Komet z Budestec a manufaktura za spirituozy z Korzymja. Pjatk je so Smjerdźečanska rejowanska skupina na jewišću Sakskeje prezentowała. Njedźelu wustupi dujerska kapała Horjany. Zeleny tydźeń w Berlinje je so prěni raz 1926 přewjedł - mjeztym su wiki po cyłym swěće najwjetše za zežiwidła a ratarstwo. Z cyłeje Sakskeje so dohromady 65 zawodow předstaji.

Wot kónca junija budźe kulturny dom w Sulšecach bjez wotnajerja. To wobkrući na naprašowanje Kulowski měšćanosta Markus Posch. Objekt słuša mjenujcy městu Kulow. Dotalna wotnajerka je swoje zrěčenje za wužiwanje domu wupowědźiła. Město chce wužiwanje objekta potom znowa wupisać. Tež w Rachlowje je město Kulow wobsedźer tamnišeho něhdyšeho hosćenca. Tam nimaja dotal žanych zajimcow.

W Pěskecach chce tamniše sportowe towarstwo zhromadnje z Njebjelčanskej gmejnu lětsa w nalěću elektriku w sportowym domje ponowić, dokelž je tuta dodźeržana. Nimo toho maja so po načasnych techniskich standardach susodny młodźinski klub kaž tež wonkowne připrawy zawěsćić. Ponowjenje płaći nimale 21.000 eurow. 70 procentow wudawkow spěchuje Hornjołužiska hola a haty přez strategiju wuwića LEADER.

Mediciniska fachowa powołanska šula Łužiskeho klinikuma we Wojerecach swoju kapacitu za wukubłanje zwyši. W přichodźe chcedźa tam hač do 50 wučomnikow wukubłać - k tomu přećehnje šula do nowych a wjetšich rumnosćow. Městno je w Kinajchće w tamnišim něhdyšim ličenskim centrumje. Z tym reaguje chorownja na to, zo nima dosć hladanskeho personala. Tak je tohodla aktualnje gynekologiski wotrjad chorownje zawrjeny. Dohromady ma klinikum 400 chorobnych sotrow a hladarjow.

Na wotewrjenje wustajeńcy w něhdyšim Radworskim dwórnišću je pjatk na 30 ludźi přišło. Tam wustajeja so wotnětka twórby, kotrež nastachu předlońšim na molerskej dźěłarničce pod nawodom Maje Nageloweje. Hač do spočatka měrca so wobrazy pokazaja. Je to zhromadna wustajeńca Spěchowanskeho towarstwa za ludowu kulturu a towarstwa Radworskeho dwórnišća inkluzije, kotraž bě do toho tež hižo w Serbskim domje w Budyšnje widźeć.