Powěsće: póndźelu, 20.01.2025

Serbski ludowy ansambl zhladuje na wuspěšnu premjeru ptačokwasneho programa "Lubosć na žołmach" sobotu w Choćebuzu. Kaž rěčnik ansambla, Stefan Cuška, bilancuje, je so skerje lochki program wot publikuma derje přiwzał. Premjera na komornym jewišću statneho dźiwadła bě wupředata. Libreto je k dźesatemu razej napisała Jěwa-Marja Čornakec. Hłownej róli hraještaj jako hosćej Božena Bjaršec a Marko Bulank-Paška. Njedźelniše wječorne ptačokwasne předstajenje w Lubinje pak je ansambl přemało zajima dla wotprajił. Prěnje hornjoserbske předstajenje je sobotu w Radworskej Slaviji.

W januarje započnu we Łužiskim klinikumje we Wojerecach přetwar stacije za operacije přihotować. Twarić pak ma so hakle w meji. Za čas přihotow a přetwara chorownja wšón čas dale operuje, slubi jednaćelka Juliane Kirfowa. Mjez druhim dóstanje chorownja nowy operaciski roboter za urologiju. Dalša žurla so wo nowy aparat rozšěri, z kotrymž móža so pacienća hnydom při operaciji röntgenować. Přetwar płaći šěsć a poł miliona eurow. 90 procentow zapłaći Zwjazk, zbytne dźesać Sakska. Pjenjezy su ze spěchowanskeho hornca za strukturnu změnu.

Z wopomnjenskim nyšporom a počesćenjom při rowje na Mikławšku su njedźelu Budyska wosada, Towarstwo Cyrila a Metoda a Maćica Serbska na 100. posmjertniny Jakuba Skale spominali. Předsyda TCM Cyril Hančik předstaji žiwjenjoběh Skale a tež, zo je so diplomatisce za znowazałoženje Mišnjanskeho biskopstwa zasadźował. Předsydka Maćicy Serbskeje Anja Pohončowa Skalu hódnoćeše a praji, zo běchu sej jeho na ewangelskej a katolskej stronje wažili. Jakub Skala bě před wjace hač 100 lětami serbski duchowny a tachant a mjez druhim předsyda Towarstwa Cyrila a Metoda kaž tež Maćicy Serbskeje.

Stare tekstilije smědźa so nadal do wotpadkow mjetać. To wobkrući Budyski krajnoradny zarjad. Njewěstosć nasta noweho rjadowanja EU dla, po kotrymž maja so stare drasty separatnje hromadźić. Něchtóžkuli sej tohodla mysleše, zo scyła wjace žane stare tekstilije do wotpadkow njesłušeja. Mazane a skóncowane drasty pak móža so kaž dotal z wotpadkami wotbyć. Trjebane, ale hišće kmane drasty so porno tomu w containerach hromadźa a wot dworow za hódnotne maćizny wokrjesa přiwzaja.

Wot póndźele hač do štwórtka pokazuje filmowča Grit Lemke swojej dokumentaciji "Pola nas rěka wona Hanka" a "Gundermann Revier" štyri razy w Okcitanskej, w juhu Francoskeje. Filmaj pokazujetej so z francoskimi podtitulemi. "Pola nas rěka wona Hanka" je srjedu tež oficialny němski přinošk w Montpellieru při swjatočnosći k Němsko-Francoskemu dnjej. Okcitanska je partnerski region Sakskeje a kaž Łužica hórnistwowy region.

Při ponowjenju Krajneje šule za rybarstwo w Rakecach su kaž planowane loni kónc lěta dźěła za zwottorhanje na wšěch třoch twarjenjach zakónčili. Kaž Sakski imobilijowy a twarski management zdźěli, dźěłaja tuchwilu na hrubym twarje w hrodźe. Kózły w zapadnym dźělu hroda su bóle wobškodźene hač wočakowane. Tohodla móža wšelake wotrězki hakle wot nazymy saněrować. Cyłkownje pak maja twarske dźěła w Rakecach kaž planowane hač do kónca lěta 2026 zakónčene być.

Na Wojerowskim dwórnišću je Němska železnica kónc tydźenja twarske dźěła za nowy tunl zahajiła. Tam móža pasažěrojo w přichodźe direktnje z naměsta před dwórnišćom na nastupnišća hić. Wot spočatka nowembra hižo Wojerowske dwórnišćo modernizuja a bjezbarjernje wuhotuja. Wone dóstanje lifty, nowe wobswětlenje, ławki a witriny za jězbne plany. Twarske dźěła maja cyłkownje hač do lěća 2026 trać. Němska železnica, kraj Sakska a VVO inwestuja do modernizowanja 21 milionow eurow.