Powěsće: štwórtk, 16.01.2025

Planowanski běrow Gumpert z Kulowa je srjedu na posedźenju Worklečanskeje gmejnskeje rady koncept za přetwar tamnišeje wyšeje šule předstajił. Mjez druhim budźe jědźernja šule wo wjele swětliša a někotre rumnosće so přerjaduja. Dale ma so tež lift zatwarić a wokna při puću so kompletnje ponowja. W februarje je zhromadna čestnohamtska rumowanska akcija z wjesnjanami a wjesnjankami planowana. Kónc měrca chce Worklečanska gmejna z ponowjenjom objekta započeć.

30 próstwow wo spěchowanje je so pola LEADERoweho běrowa Hornjołužiska hola a haty w Rakecach zapodało. To je dotal najwjace w spěchowanskej periodźe. Doba za požadanja w štwórtym kole je so tutón tydźeń zakónčiła. Cyłkownje maja projekty hódnotu 1,2 milionaj eurow. Drje su w nimale wšěch wobłukach wuwićoweje strategije próstwy dóšli, tola w někotrych kategorijach je wjace požadanjow, hač hodźi so spěchować. Spočatk měrca rozsudźa, kotre projekty w regionje Hornjołužiska hola a haty spěchuja a kotre nic.

Jednaćelka Domowiny, Judit Šołćina, bu powołana do přirady za serbske naležnosće města Budyšin. To je prezidij Domowiny srjedu na swojim posedźenju wobzamknył. Loni je měšćanska rada wobzamknyła, přiradu za serbske naležnosće wutworić. Dotalny dźěłowy kruh přeměni so do přirady. Tuta poradźuje měšćansku radu, kaž tež wyšeho měšćanostu we wšěch serbskich naležnosćach. Nimo Domowiny maja tež Załožba za serbski lud, frakcije měšćanskeje rady, kaž tež wyši měšćanosta prawo, wěcywustojnu wobydlerku abo wěcywustojneho wobydlerja namjetować.

W Drobach pola Minakała bědźa so wobydlerjo w ćopłych měsacach z nadměru wjele muchami. To je njewotwisna fachowča srjedu Radworskej gmejnskej radźe wobkrućiła. Wona je situaciju dlěje hač poł lěta wědomostnje přepytowała. Zwotkel pak zdźěla hoberske masy třoch wšelakich družin muchow přińdu, njemóže tež wona dokładnje rjec. Jasne drje jenož je, zo njepochadźeja wone z bliskeho składa za wotpadki firmy Veolia ani z bliskeje hródźe. Fachowča mjenowaše situaciju w Drobach nimale jónkrótnu w Němskej. Za přičinu dyrbja nětko dalši fachowcy z ratarstwa a wodoweho hospodarstwa slědźić.

Přistaw při Parcowskim jězoru po tuchwilnych planach wot spočatka přichodneho lěta twarja. Kaž saněrowar něhdyšich jamow LMBV zdźěli, maja dźěła něhdźe połdra lěta trać. Při jězoru nastawatej přistaw za pasažěrske łódźnistwo a městna za sportowe čołmy. Twar na starosći ma gmejna Halštrowska Hola. Wobaj projektaj swobodny stat spěchuje.