Powěsće: srjedu, 15.01.2025

Zastupne lisćiki za hornjoserbske předstajenje wječorneho ptačokwasneho programa Serbskeho ludoweho ansambla w Chrósćicach spočatk februara su nimale wupředate. W programje "Lubosć na žołmach" dźe z parnikom z Drježdźan do Prahi. Libreto je znowa Jěwa-Marja Čornakec napisała. We hłownymaj rólomaj widźa přihladowarjo lětsa Boženu Bjaršec a jej po boku steji Marko Paška. Hornjoserbska premjera za wječorny program je sobotu za tydźeń w Radworju. Nimo programa za dorosćenych přihotuja wuměłcy po tradiciji tež dźěćacy ptačokwasny program. "Potajny pakćik" změje 29. januara w Budyšinje swoju hornjoserbsku premjeru.

Na swojim wčerawšim posedźenju zarjadniskeho zwjazka Při klóšterskej wodźe w Pančicach-Kukowje wobzamknychu radźićeljo hospodarski plan za lěto 2025. Wotedawk pjeć přisłušnych gmejnow na zwjazk so tež lětsa zaso powyši. Wo 27 eurow na potom 242 euro na wobydlerja zarjadniskeho zwjazka.

Do bywšich jamow, kiž su mjeztym jězory, je saněrowar něhdyšich jamow LMBV loni 86 milionow kubiknych metrow wody běžeć dał. To pisa zawod w swojej nowinarskej zdźělence. Najwjace wody za jamy wužiwachu ze Sprjewje, mjeńši dźěl z Čorneho Halštrowa, cyle snadnje z Nysy. Porno 86 milionam kubiknych metrow wody, kiž su brali, su 76 milionow kubiknych metrow zaso do rěčnišćow wotpušćili, zo bychu pegele dźerželi a ekologijow rěkow zaručili.
Po informacijach LMBV je zaliwanje něhdyšich jamow z wodu, zo bychu jězory nastali we Łužicy nimale hotowe.

Kooperacija mjez Smochčanskim kubłanišćom swjateho Bena a Domowinu ma so dale wjesć. Na to dojednaštaj so wčera předsyda třěšneho zwjazka Dawid Statnik a tamniše wjednistwo. Byrnjež ma so w přichodźe Smochčanske kubłanišćo jako centrum za dalekubłanja a přenocowanja wukmanjeć, chce wostać zwjazany z cyrkwju a tež ze Serbami. Smochčanske kubłanišćo swjateho Bena je spěchowanski partner Domowiny.

W Rakecach a wjesnych dźělach gmejny su wčera wodowód reparowali. Ponowjenje bě nuzne trěbne. Wo tym informowaše Rakečanski zastaraćel. Scyła žanu pitnu wodu njejsu wčera dopołdnja w Jitku a na přemysłowej přestrjeni w Rakecach měli kaž tež nic w domjacnosćach w Ralbicach a Nowoslicach, kiž su pola Kamjenskeje EWAG. Reparatura rowow pak je so derje radźiła, samo spěšnišo hač bě planowane, zdźěli Rakečanski zastaraćel. Tak mějachu hižo připołdnju zaso pitnu wodu z honača, kotraž pak hač do wječora z blakami mutna wosta a tež z prawym čisćom njeběžeše.