Powěsće: wutoru, 14.01.2025

Mjeńšinowy sekretariat kaž tež Mjeńšinowa rada stej byłoj na přijeću přez zwjazkoweho prezidenta Steinmeiera, a stej so z tym ze zymskeje přestawki nawróćiłoj. Lětsa přewozmje so kóždolětne měnjace předsydstwo Gitte Hougaard-Wernerowa z danskeje mjeńšiny. Wona wuzběhny, zo wočakuje politisce wužadace lěto, w kotrymž měli so wosebje mjeńšiny při rozsudach njezabyć. Jedna z nowych sobudźěłaćerkow w Mjeńšinowym sekretariaće je rodźena Delnjoserbowka Carolin Rennerojc. Wona je nowa referentka za sposrědkowanje wědy a wjeseli so wosebje na to, dźěło Mjeńšinoweho sekretariata nastupajo komunikaciju z politikarjemi a zjawnostne dźěło podpěrać. Tak rěka w aktualnej zdźělence z Berlina.

Gmejny zarjadniskeho zwjazka "Při Klóšterskej wodźe" su dosć derje na wólby do noweho Zwjazkoweho sejma za něšto wjace hač měsac přihotowane. Kaž zdźěli nawoda Stefan Anders na naprašowanje, bě wón spočatnje skeptiski, hač so w běhu krótkeho přihotowanskeho časa wšo organizować hodźi. Zymskich prózdninow dla drje někotři wólbni pomocnicy wupadnu, kiž hodźa so pak z hinašimi narunać. Tak wupada nětko za tym, zo změja we wšitkich wosom wólbnych lokalach w gmejnach zarjadniskeho zwjazka dosć hłowno- kaž tež čestnohamtskich pomocnikow, tak Anders. Wólby do Zwjazkoweho sejma přewjedu so 23. februara.

W Radworju su sej wjesnjenjo póndźelu zhromadnje historiske fota a wideja swojeje wsy a wokoliny wobhladali. Je hromadźili, zestajeli a po wječoru wjedli běchu Pětr Kliman, Beno Bělk a Bosćij Handrik. Mjez druhim dokumentowachu wobrazy wuwića hosćenca "Meja", wjesneho žiwjenja a nałožkow we wšelkich dobach. Zajim na wot chóra Meje wuhotowanym zarjadowanju bě tajki wulki, zo za wjace hač połsta přitomnych stólcy w Słodenku njedosahachu.

Zhorjelski wokrjes pyta nuznje za nowej móžnosću, azyl pytacych w Běłowodźanskej kónčinje zaměstnić. Dotal běchu ludźo w prjedawšej powołanskej šuli Hamorskeje milinarnje bydlili. Dokelž pak změni imobilija lětsa w prěnim kwartalu wobsedźerja - wokrjes předa ju na LEAG - pyta so nětko za alternatiwu. Při tym je LEAG tomu přihłosowała, zo přechodnje hač do meje klětu přebywanišćo za ćěkancow dale wobhospodari. To je hižo lěto dlěje hač dotal planowane, rěka ze zarjada za porjad w Zhorjelskim wokrjesu. W dobje wot junija 2023 hač do decembra 2024 bydleše w přebywanišću cyłkownje něšto wjace hač 230 wosobow.

Hnydom štyrjom serbskim koparskim cyłkam je sportowe sudnistwo Zapadołužiskeho koparskeho zwjazka (WFV) tři dypki we wotpowědnych tabulkach wotćahnyło. Přičina je stajnje ta samsna: Njejsu móhli dosć trěbnych licencowanych koparskich sudnikow stajić, njejsu normy za to spjelnili. Potrjechene su cyłki Sokoła Ralbicy/Hórki, Sportoweje jednotki Njebjelčicy, Sportoweje jednotki Chrósćicy a Sportoweho towarstwa Marijina hwězda. Nimo runje mjenowaneho kwarteta je sportowe sudnistwo WFV dźewjeć dalšim mustwam tři ličaki wotćahnyło.