Powěsće: póndźelu, 23.12.2024

Wot srjedź januara započnje so nutřkowne a wonkowne ponowjenje Budyskeje cyrkwje Našeje lubeje knjenje. To wozjewi na njedźelnych kemšach tachantski farar Wito Sćapan. Sakske statne ministerstwo za regionalne wuwiće je spěchowanje přizwoliło, swójski podźěl njese wosada. W přichodnych měsacach ma so wonkowny wobmjetk cyrkwje ponowić, znutřka planuja sćěny a ławki wobarbić kaž tež nowe wobswětlenje instalować. Wot 19. januara wotměja so hłowne kemše w Tuchorskej a nyšpory w Tanchantskej cyrkwi.

Rowniske dźěćetko je sobotu na Njepilic statoku adwentne žohnowanje wudźělało. Jemu po boku běštej přewodnicy w Slepjanskej zymskej burskej drasće. Dale přijachu wěriwi a hosćo adwentneho swjedźenja Betlehemske měrowe swětło. Žónska spěwna skupina “Rowniske glosy” zanjese mjez druhim tradicionalne adwentne a hodowne spěwy holanskeho regiona. Towarstwo Njepilic dwór postara so wo zastaranje hosći. Tež w Čornym Chołmcu bě njedźelu Wojerowske dźěćatko ducy, kotrež njepožohnowa jenož wěriwych po kemšach, ale wopyta tež swójby ze wsy doma.

Na tójšto wsach Hornjeje Łužicy mějachu tež na štwórtym kóncu tydźenja adwentne wiki. W Pěskecach je tamniša młodźina sobotu budku při kapałce stajiła. Wjeršk běštaj rumpodichaj, kotrajž staj wjesnym dźěćom wobradźiłoj. W Ralbicach přeprosy sobotu tohorunja młodźina na adwentne wiki. Něhdźe 150 wopytowarjam poskićowaše Ralbičanski pjekar Roman Šołta šokolodźane chłóšćenki z předawanskeho woza, młodźina pječeše wafle a pražeše kołbaski a rumpodich dojědźe k dźěćom z kwadom. W Hórkach přeprosy njedźelu wjesne towarstwo "Při skale" na adwentne wiki při gratowni wohnjoweje wobory. Prěni raz zaspěwa w Hórkach před něhdźe 200 wopytowarjemi tamniši adwentny chór.

Produkciska hala mebletwarca Maja w Brěžkach je nadal na předań. Za jeje zwičnjenje je mjeztym specializowany maklerski běrow z Lipska zamołwity, praji Kulowski měšćanosta Markus Posch. Tež hospodarske spěchowanje Sakskeje spyta so hodźaceho wužiwarja namakać – dotal bjez wuspěcha. Loni kónc lěta su w zawodźe w Brěžkach, w kotrymž dźěłaše 450 ludźi, přestali produkować. Přičina bě ćežka situacija na wikach meblow.

W Serbskim ludowym ansamblu wuhotowachu dorostowe skupiny Łužičanka a Łužičanska rapsodija sobotu a njedźelu štyri předstajenja. Na nich zličichu dohromady wjac hač 600 wopytowarjow. Na 4. a zdobom posledni lětuši adwentny koncert orchestra Serbskeho ludoweho ansambla w Radworskej Meji bě 45 hosći přišło. Pod nawodom dirigentki Kathariny Dickopf zaklinčachu twórby serbskeju komponistow Helmuta Fryče a Jana Rawpa, kaž tež sławne melodije Pjotra Čajkowskeho a Antonína Dvořáka.