Powěsće: pjatk, 20.12.2024

W nowym sakskim knježerstwje je ministerka za wědomosć, kulturu a turizm, Barbara Klepschowa (CDU), dale zamołwita za Serbow. W kultusowym ministerstwje je wot nětka Conrad Clemens (CDU) minister kubłanja a z tym tež zamołwity za serbske kubłanske prašenja. Serbske šulske towarstwo (SŠT) wita, zo ma Sakska noweho kultusoweho ministra. Kaž zdźěli předsydka SŠT, Katharina Jurkowa, je Clemens hižo přez swoje dotalne městno w statnej kencliji ze Serbami zwjazany był. W nowym lěće chce towarstwo z ministrom kontakt nawjazać a wo zarjadniskich postajenjach za serbske šule jednać.

Krajnaj radaj wokrjesow Budyšin a Zhorjelc, kaž tež wyši měšćanosća Budyšina, Zhorjelca, Wojerec a Drježdźan žadaja sej wot noweho sakskeho krajneho knježerstwa elektrifikaciju železniskeje čary Drježdźany-Zhorjelc. Žadanje zwuraznichu štwórtk na regionalnej konferency w Budyšinje, ke kotrejž bě tež ministerski prezident Michael Kretschmer přišaltowany. Komunalni politikarjo skedźbnjeja w poziciskej papjerje na to, zo bě so hižo w krajnym wuwićowym planje lěta 2013 zapisało, zo dóstanje region wukonliwy wobchadny zwisk přez kolije a awtodróhu. Krajne knježerstwo ma pola Zwjazka na to tłóčić, zo so tutón zaměr zwoprawdźi. Wutwar železniskeje čary je za hospodarske wuwiće regiona njeparujomny, tak podpisarjo papjery.

We wjeskach gmejny Chrósćicy zwyši so psyči dawk. Za prěnjeho psa žada sej gmejna wot klětušeho 15 eurow wjac, a z tym 50 eurow na lěto. Nimo toho rjaduja wotpowědne wustawki tež dawk za tak mjenowane "strašne" psy.  Za tajkich płaća wobsedźerjo wot klětušeho 200 eurow na lěto. Tajkich pak, tak wjesnjanosta Marko Kliman na gmejnskim posedźenju štwórtk rjekny, w gmejnje tuchwilu nimaja. 

Něhdźe 120 ludźi dožiwi štwórtk na Serbskej wyšej šuli w Ralbicach knižnu premjeru. “Šula je wutroba wsy” rěka 70-stronski zběrnik. Šulerjo 8. lětnika znosychu stawizny kubłanišća minjenych 50 lět z pomocu dožiwjenjow něhdyšich šulerjow. Wušoł je nakład z pomocu Ludoweho nakładnistwa Domowina.

Po wjacorych lětach přestawki přewjedźe Zapadołužiski koparski zwjazk zaso wokrjesne halowe mišterstwa za koparski dorost, žony a starych knjezow. W starobnej klasy młodźina C je so mjez druhim cyłk Sokoła Ralbicy/Hórki přizjewił a pola młodźiny D Módro-běli z Kulowa. Turněry přewjedu so w januarje a februarje.