Powěsće: štwórtk, 19.12.2024

Sakski krajny sejm w Drježdźanach je srjedu na swojim posedźenju Radu za serbske naležnosće Swobodneho stata Sakskeje wolił. Gremijej přisłušeja Diana Šołćina, Julian Nyča, Dawid Statnik, Jan Ryćer a Stefan Anders jako zastupjer za serbske komuny. Kandidat towarstwa SMY, dr. Tomaš Wornar, njemóžeše so porno tomu při wólbach přesadźić. Statna ministerka Barbara Klepschowa wuzběhny, zo je rada wažna serbska instanca při zhromadnym dźěle z krajnym sejmom a sakskim knježerstwom.

Město Budyšin je jedna z jenož hišće mało komunow w Sakskej, kiž móža ze swójskich mocow swój hospodarski plan wurunać. To praji financny měšćanosta Robert Böhmer srjedu na posedźenju měšćanskeje rady při prěnim čitanju hospodarskeho plana za klětu. Tutón pak budźe jenož tohodla bjez minusa, dokelž su wšitke wobłuki zarjada swoje wudawki dokładnje pruwowali a pjenjezy zalutować móhli. Klětu srjedź lěta chce město rozsudźić, hač nowu sportownju twari abo Allendowu wyšu šulu saněruje.

Kubłanišćo swj. Bena w Smochćicach chce so w přichodźe bóle w regionje etablěrować. To praji Sybille Richardsowa, kiž wot 2025 nawodnistwo hoteloweho managementa přewozmje. W nowinskej zdźělence Drježdźansko-Mišnjanskeho biskopstwa rěka dale, zo chce so nowa nawodnica zhromadnje z cyłym teamom tež za nowe wusměrjenje domu zasadźić. Mjez druhim ma so znatosć kubłanišća w regionje a zwonka Łužicy zwyšić a kubłanske poskitki chcedźa w přichodźe dale wuwiwać. 45-lětna Richardsowa je na hessenskej powołanskej akademiji diplom złožiła a je po tym mjez druhim jako referentka w komunikaciji, jako prokuristka a projektowa managerka dźěłała.

W Rakecach předstaji Franziska Pfeifferowa z gmejnskeho zarjada srjedu gmejnskej radźe naćisk hospodarskeho plana 2025/26. Situacija drje njeje po jeje měnjenju róžojta, dokelž přińdźe na přikład w přichodnymaj lětomaj wot předewzaćelow mjenje rjemjeslniskeho dawka. Wšitke zakładne nadawki, kaž zastaranje dźěći w dźěćacych zarjadnišćach, pak su zaručene – za nje je 1,8 milionow eurow zaplanowane. Tež za dobrowólne wudawki, kaž spěchowanje towarstwow, su podobne pjenjezy předwidźane, kaž dotal.

W Hodźiju chcedźa w nowym lěće wotpaleny młodźinski klub zaso natwarić. Za nowy domicil chcedźa modulowy system wužiwać, tak wjesnjanosta Gerald Meyer. Gmejna je k tomu hižo z firmu z regiona w rozmołwje. Pjenjezy za twar přińdu na jednym boku z mytowanja, kotrež je gmejna při sakskim wubědźowanju “Čiń sobu” dobyła, tamne płaći po wuprajenju wjesnjanosty zawěsćernja. Wo doskónčnej wysokosći wudawkow so hišće jedna. Lětsa w januarje bě so towarstwowy dom, w kotrymž bě młodźinski klub zaměstnjeny, wotpalił. Wobsteji podhlad na zapalerstwo, policija hišće přepytuje.