Powěsće: srjedu, 19.12.2024

Jeli komuny zwonka Budyskeho wokrjesa centrum za techniku wohnjoweje wobory w Kamjencu a Biskopicach wužiwaja, dyrbja za to wot klětušeho wjace płaćić. To je Budyski wokrjesny sejmik wobzamknył. Městam a gmejnam Budyskeho wokrjesa wobliča kaž dotal 40 procentow kóštow, tamne komuny pak dyrbja 100 procentow płaćić. Spočatnje chcyše wokrjes popłatk zasadnje zwyšić, radźićeljo pak dojednachu so potom na kompromis. W centrumje za techniku wohnjoweje wobory móža komunalne wobory škitnu a hašensku techniku pruwować, rjedźić a hladać dać.

Zawod za wopłóčki w Kulowje wuńdźe po lětach komunalneje podpěry nětko bjez přiražkow města. Wulki dźěl kreditow je mjeztym wotpłaćeny, zdźěli Kulowski komornik Mathias Kockert na zašłym posedźenju měšćanskeje rady. Lětsa je wopłóčkowy zawod 77.000 eurow dobytka nadźěłał, tež za klětu liči z plusom. Rjedźernja wopłóčkow je w dobrym stawje, někotre klumparnje su lětsa ponowili. Klětu chcedźa mjez druhim do ponowjenja kanalowych systemow inwestować.

Centrum za autonomne a elektriske lětanje (AEF) w Kamjencu chce klětu zastaranje chorownjow z trutami wupruwować. W pózdnim nalěću móhli tak prěnje krejowe proby abo medikamenty z trutami do chorownjow transportować. Tuchwilu hišće pruwuja, hač je na lětanskich čarach trěbna syć 5G. Kaž centrum dale zdźěli, ma pjeć wukubłanych pilotow trutow za to. AEF w Kamjencu mjeztym ze 60 partnerami w tu- a wukraju hromadźe dźěła. Firma z Würzburga na přikład testuje tuchwilu w Kamjencu trut, kiž móže dźesać kilogramow hodźinu dołho transportować. Po předstawach centruma ma so Łužica z modelowym regionom za awtonomne lětanje stać.

W Bóšicach je wjesnjanosta Stani Ryćer wutoru gmejnsku radu informował, zo budźe ponowjenje puća mjez Wětrowom a Nowymi Bóšicami wo 60.000 eurow dróše. Tam je twarska firma zwěsćiła, zo je hlinjany pěsk pod dróhu přemjechki a měł so ze šoterom wuměnić. Z tym pak płaći ponowjeny a nimale kilometer dołhi wotrězk komunalneje dróhi nětko něhdźe 400.000 eurow. Puć mjez Wětrowom a Nowymi Bóšicami je najwjetši lětuši twarski projekt gmejny. Po słowach wjesnjanosty zapłaća wšo z gmejnskeje kasy a bjez spěchowanja.