Powěsće: wutoru, 17.12.2024

Budyski wokrjesny sejmik je póndźelu dwójny hospodarski plan wokrjesa za 2025/26 wobzamknył. W nim pobrachuje 54 milionow eurow. Wokrjes dyrbi w tutym času tež wšitke rezerwy přetrjebać. Njedźiwajcy toho inwestuje dale do wutwara syće, šulskich twarjenjow, do modernizowanja powołanskich šulow a noweje hudźbneje šule. Dla napjateje financneje situacije sakskich wokrjesow su krajny rada Udo Witschas, frakcije a skupiny wokrjesneho sejmika póndźelu podpisali rezoluciju na nowe sakske knježerstwo a krajny sejm. W njej žadaja sej mjez druhim, zo měli so zarjadniske procesy zjednorić a zo njeměł kraj wokrjesam dalše nadawki nabrěmjenić. Nimo toho měła so Sakska na financowanju socialnych wudawkow wokrjesow wobdźělić.

Nowa Serbska rada w Braniborskej je wuzwolena. Najwjace hłosow su dóstali: Markus Końcaŕ, Delia Münchowa, Dieter Freihoff, Měto Nowak a Michael Apel. Münchowa a Freihoff přisłušeštaj hižo dotalnej radźe, tamni běchu w zašłosći čłonojo. Cyłkownje bě dźesać kandidatkow a kandidatow. Tróšku wjace hač tysac ludźi je nowu radu woliło. Wólbny wuslědk dyrbi nětko Krajny sejm Braniborskeje hišće wobkrućić.

W hornjołužiskich lěsach su skórniki lětsa tójšto mjenje škody načinili hač w zašłych lětach. To wuńdźe z kóždolětneje rozprawy wo situaciji lěsow w kraju, kotruž je sakske ministerstwo za wobswět póndźelu předstajiło. Přičina za pozitiwne wuwiće bě mjez druhim lětuše skerje włóžne wjedro. Tohodla běchu štomy sylniše a móžachu so přećiwo škódnikam lěpje wobarać hač w zašłych suchich lětach. Dalša přičina pak je, zo je w hornjołužiskich lěsach jenož hišće mało šmrěkow, na kotrež so skórniki wosebje měrja.

Zběrnik esejow "Serbstwo, quo vadis?" je w Ludowym nakładnistwje Domowina wušoł. Wudawaćelka Marka Maćijowa bě 19 awtorkow a awtorow z Hornjeje, srjedźneje a Delnjeje Łužicy za antologiju zdobyła. W předsłowje wona pisa, zo je paleta temow jara šěroka a zo njeskića teksty žane hotowe wotmołwy. Eseje měli čitarstwu skerje nastork dać, wo tučasnym stawje a wo přichodźe serbskeje towaršnosće rozmyslować. Kniha wobsahuje hornjo- a delnjoserbske teksty.

Němsko-čěski fonds přichoda spěchuje klětu wjace hač 120 projektow w hraničnym regionje. Zarjadniska rada je nětko spěchowansku lisćinu za nowy lětnik wobzamknyła. Nimo šulerskich wuměnow, swjedźenjow a kulturnych zarjadowanjow w Němskej a Čěskej podpěruje fonds ponowjenje sakralnych twarjenjow a kulturnych pomnikow. Tak spěchujetej so dalše saněrowanje třěchi klóštra w Hejnicach a wustajeńca wo 300-lětnej róčnicy natwara tamnišeje cyrkwje. Tež za restawrowanje baziliki w Filipovje přińdu pjenjezy z Němsko-čěskeho fondsa přichoda. Wón bu 1997 załoženy, Němska a Čěska jón zhromadnje financujetej.