Powěsće: póndźelu, 16.12.2024

W tójšto wsach a městach Hornjeje Łužicy mějachu tež třeći kónc tydźenja w adwenće hodowne wiki. W Kamjencu bě sobotu a njedźelu 19. Adwentny spectaculum. We Wojerecach su hodowne wiki pomjenowane po wjerchowce von Teschen, kotraž bě we 18. lětstotku knjeni Wojerowskeho hrodu. Na adwentnych wikach w klóštrje Marijina hwězda w Pančicach-Kukowje je sobotu mjez druhim chór Serbskeje zakładneje šule Ćišinskeho zaspěwał. Dalše wiki běchu mjez druhim w Smjerdźacej, we wowčerni biosferoweho rezerwata w Stróži, w Rakecach a Worklecach.

W Budyskim wokrjesu měješe loni 17 procentow wšěch firmow wukrajnych sobudźěłaćerjow, w Zhorjelskim wokrjesu kóžda štwórta. To wuńdźe ze statistiki Zwjazkoweje agentury za dźěło. Z tym leži podźěl wukrajnych sobudźěłaćerjow w Hornjej Łužicy tójšto pod cyłoněmskim přerězkom a tež tróšku pod sakskim. We wjace hač 3.100 hornjołužiskich zawodach dźěła znajmjeńša jedyn čłowjek z wukraja, to je 870 wjace hač před pjeć lětami. Najwjace je jich w gastronomiji, we wobchadźe a w składach.

Drježdźansko-Mišnjanske biskopstwo přizwoli nowotwarej wosadneho domu "Radlubin" w Ralbicach. Wo tym informuja wosadu w aktualnych wozjewjenjach. Nimo toho dósta wosada tež přizwolenje spěchowanja twara wot swobodneho stata Sakska. Informaciski wječor wo twarskim projekće je pjatk. Wosadny dom je pomjenowany po spisowaćelu a duchownym Mikławšu Bjedrichu Radlubinje, kiž běše na proze 20. lětstotka w Delanach tež wosadny farar.

Wobšěrne ponowjenje B 97 mjez Wojerecami a Grodkom so dale dliji. Saněrowar bywšich jamow LMBV z toho wuchadźa, zo móže dźěła na wotrězku pola Sprjewineho Doła hakle 2030 zahajić. Jako přičinu mjenuje dołhe procesy dowolenja, techniske wužadanja a ćeže z ležownosćemi. Wjacore posudki wo pódźe a wobswětowych aspektach je LMBV hižo zhotowić dała. Přichodny krok ma być testowe polo pódla dróhi. Tam chcedźa wuspytać, kak hodźi so dno najlěpje skrućić. B 97 wjedźe tam po nasypje něhdyšeje jamy.

Hač so dźiwadłowe zetkanišćo Thespis při Němsko-Serbskim ludowym dźiwadle w Budyšinje klětu dale powjedźe, njeje hišće jasne. Jedne ze sakskich spěchowanjow za lěto 2025 njeje so jim dotal přilubiło. Dyrbjało-li so w centrumje dale dźěłać, je w aprylu znowa projekt ze serbskimi temami planowany. To zdźěli nowinska rěčnica dźiwadła Gabriela Sušcyna na naprašowanje. Nawoda socio-dźiwadłoweho centruma Georg Genoux drje Thespis kónc lěta wopušći, chce pak dale čestnohamtsce skutkować.