Powěsće: wutoru, 12.11.24

Tuchwilu předstaja Serbski ludowy ansambl serbskorěčny šulerski koncert "Abrafaxy a Čorny młyn". Jedna so wo inscenaciju z wobrazami, rěčnikom a instrumentalistami wokoło figurow Abraxa, Brabaxa a Califaxa ze znateho zešiwka "Mosaik". Hudźbnu stawiznu z pjera Vincenta Strehlowa poskićuja w serbskej runje tak kaž w němskej rěči. Minjeny pjatk bě serbskorěčna premjera a dalše předstajenja su we Worklečanskej a Chróšćanskej šuli planowane.

W Hamorje maja nowa pěstowarnja, hort a sportownja na šulskej ležownosći nastać. Za to wupraji so póndźelu jednohłósnje Hamorska gmejnska rada. Twarjenja su ze 70-tych lět a ponowjenje njeby hospodarske było, tak wjesnjanosta Hendryk Balko. Nětko ma pěstowarnja hnydom pódla zakładneje a wyšeje šule nastać, runje tak kaž hort a ćěłozwučowarnja. Za projekt planuja inwesticije we wysokosći 17 milionow eurow, za čož chcedźa so wo spěchowanske srědki prócować.

W septembrje a oktobrje njejsu w Sakskej hižo žane nowe pady afriskeje swinjaceje mrětwy zwěsćili. Z tym je so wočiwidnje tež połoženje w sewjeru Budyskeho wokrjesa změrowało, hdźež běchu hišće w lěću inficěrowane dźiwje swinje namakali. To zdźěli sakske socialne ministerstwo. Wot oktobra 2020, jako afriska swinjaca mrětwa w regionje wudyri, bu w Budyskim wokrjesu 822 padow wobkrućene, w Zhorjelskim 1.467.

Dom Měrćina Nowaka w Njechornju ma muzej wostać - za to su so wjesnjenjo na zetkanju z Domowinu wuprajili. Předsydstwo župy "Jan Arnošt Smoler" bě njedźelu na rozmołwu wo přichodźe twarjenja přeprosyło. Kaž regionalna rěčnica Katja Liznarjec zdźěli, bě něhdźe 30 ludźi přišło. Přitomni Njechornčenjo sej přejachu, zo měł dom molerja w přichodźe prawidłownje wotewrjeny być, na přikład tež za putnikow. W januarje planuje župa dalše zetkanje.

W Ludowym nakładnistwje Domowina je dalša kniha wo wrobliku Fridźe wušła. Je to mjeztym jědnaty zwjazk dźěćaceje knihi z pjera Jěwy-Marje Čornakec. Tema su tutón króć póstnicy - tež tohodla budźe knižna premjera wokoło póstnic. Nowa stawiznička wroblika Frida, z barbnymi rysowankami ilustratora Güntera Wongela, je za dźěći wot štyrjoch lět.

Z Dźěwina hač do Slepoho ma kolesowarska šćežka nastać. Za nju běža tuchwilu hižo konkretne planowanja. Wo tym informowaše nawoda zarjada za planowanje, twarstwo a hórnistwo zarjadniskeho zjednoćenstwa Slepo Steffen Seidlich na zašłym posedźenju gmejnskeje rady w Dźěwinje. Hakle hdyž su wšitke prašenja swójstwa podłu planowaneje šćežki wujasnjene, móže twarski zarjad próstwu wo spěchowanje wokrjesej Zhorjelcej zapodać. Gmejna pak je dobreje nadźije, zo so to w přichodnych tydźenjach ze wšěmi potrjechenymi mějićelemi radźi.