Powěsće: póndźelu, 11.11.2024

Kónčny koncert Budyskeje chóroweje akademije generacijow wopyta sobotu wjace hač 650 ludźi. Z wulkim přikleskom a zhromadnym kanonom zakónči so projekt w Budyskej Marije-Marćinej cyrkwi. 56 spěwarjow a spěwarkow w starobje 16 do 78 lět spěwaše pod nawodom Friedemana Böhmy hłownje cyrkwinske twórby. Mjez nimi bě tež serbski spěw "Tule statok zboža stajić" a kěrluš "Strowa sy, Marija". Na pišćelach hraješe Johannes Kral. Z pomocu Budyskeho Rotary cluba je chórowa akademija nastała.

Na mnohich městnach w Hornjej Łužicy su sobotu na wopory nowemberskich pogromow w lěće 1938 a na dalše wopory nacionalsocializma spominali. Tak zhromadźi so w Hórkach při kopolaku Hanki Šěrcec před Elic statokom nawječor skupina ludźi, kiž modleše so róžowc a zaspěwa kěrluše. Mjez druhim su ludźo tež w Zhorjelskej synagoze a w Budyšinje na wopory nacionalsocializma spominali.

Serbske popołdnjo za swójby sobotu w Němcach je so derje přiwzało. Kaž zdźěli zarjadowar župa „Handrij Zejler” Wojerecy, je něhdźe 30 dźěći ze swojimi staršimi přišło, k tomu mnozy wjesnjenjo. Wulki přiklesk žnějachu dźěći tamnišeje pěstowarnje "Pumpot" za swój program. Po tym su dźěći zhromadnje paslili. Wjeršk bě předstajenje dźiwadła za dźěći „Čmjeła Hana wočakuje wopyt”.

Filmowča Maja Nagelowa je lawreatka lětušeho Spěchowanskeho myta Załožby za serbski lud we wobłuku Choćebuskeho filmoweho festiwala. Wona přija z 3.000 eurami dotěrowane myto sobotu na hłownym mytowanskim zarjadowanju festiwala za swoje wobsahowe a wuměłsce wurjadne dźěło, hladajo na serbsku kulturu, stawizny a rěč. Hižo do toho su na podijowej diskusiji wo přichodźe serbskich wobsahow w zjawnoprawniskich sćelakach rěčeli. Tohorunja sobotu su w Chóćebuzu w serbskim programje krótkich filmow "Łužica shorts" wosom filmow pokazali. Pjeć z nich bě serbskorěčnych. Filmy je sej něhdźe 200 ludźi wobhladało.

Na lětušim Hubertusowym jěchanju w Koćinje je so sobotu něhdźe 220 ludźi wobdźěliło. Nimo wjacorych dźesatkow jěcharjow na swojich konjach, bě tež dźesać zapřahow a wosom kremserow pódla. Po zhromadnym nyšporje jěchachu w dwěmaj skupinomaj – jednej spěšnišej a jednej měrnišej – po rozdźělnymaj čaromaj po wsach wokoło Kulowa. Zhromadny wobjed dachu sej při Cyganskej studni w lěsu za Koćinu zesłodźeć. Tradicionalne Hubertusowe jěchanje Kulowskich konjacych sportowcow a přećelow konjaceho sporta zakónčichu popołdnju ze zhromadnym paćerjom.

Wjace hač 50 ludźi je sobotu nazymski koncert na Smolic statoku w Hórkach wopytało. Předstajiło je so duwo „Indiwidual”, w kotrymž spěwatej Veronika Kalinučcyna a Hanka Wowčerjowa. Kaž zdźěli zarjadowar koncerta, Hórčanske wjesne towarstwo „Při skale”, zanjeseštej rjad serbskich, němskich a jendźelskich spěwow, kotrež njejsu přitomnym jenož wutroby hrěli, ale jich tež k rozmyslowanju pohnuwali.