Powěsće: sobotu, 09.11.2024

Zwjazkowe předsydstwo Domowiny je so na swojim zašłym posedźenju ze swojej dźěławosću jako gremij zaběrało. Zakład za to bě naprašnik, kotryž su čłonki a čłonojo njedawno wupjelnili, rěka w nowinskej zdźělence třěšneho zwjazka. Mjez druhim zaběrachu so z prašenjom, kak móhli nowe čłonki abo nowych čłonow za dźěło w gremiju zdobyć. Diskutowali su tež wo wuměnjenjach za diskusije w zwjazkowym předsydstwje a hač měli je hybridnje, na městnje abo kreatiwnje w skupinskim dźěle přewjesć. Čestnohamtske dźěło pak njeměło być jenož winowatosć, ale tež wjeselo a wuměna, zwurazni předsyda Domowiny Dawid Statnik.

Nowe wjesne towarstwo “Při Marijinej studničce” Róžant, kotrež su wobydlerjo lětsa w měrcu załožili, je nětko oficialne zapisane. Z tym móže wone pod nawodom předsydy Tomaša Šołty a jeho městopředsydow Mije-Katariny Hrjehorjec a Tomaša Glawša dźěłać započeć. We wustawkach noweho towarstwa w Róžeńće steji nimo powšitkownych wjesnych zaměrow a nadawkow tež podpěra putnikowanjow a cyrkwinskich zarjadowanjow.

Sawrijowy park w Małym Wjelkowje je lětsa mjenje ludźi wopytało. Kaž zdźěli nošer parka Budyska wobdźělenska a wobhospodarjenska towaršnosć BBB, zličichu lětsa 223.000 wopytowarjow. To je 17.000 mjenje hač loni. Tež tamniši labyrint su lětsa ze 17.000 hosćimi mjenje ludźi wopytali hač loni. Za klětu planuja w Małym Wjelkowje dwě nowej atrakciji, kotrejž hižo nětko přihotuja. Start do sezony 2025 je za 5. apryl planowany.

Gmejna Njebjelčicy njebudźe w Miłoćicach žanu nowu gratownju za wohnjowu woboru twarić. To zdźěli wjesnjanosta André Bulank na internetnej stronje komuny. Jako přičinu mjenuje wón špatne financne połoženje. Planowany wu- a přetwar chěže na ležownosći bywšeho prodrustwa by něhdźe 400.000 eurow płaćiło a přitwar gratownje k bywšemu konsumej wosrjedź wsy 340.000 eurow. Woboje njemóže gmejna zapłaćić. Tuž dyrbja wobornicy dale tuchwilny domicil wužiwać.

W Ludowym nakładnistwje Domowina je wušła nowa antologija z tekstami młodych awtorow. Zběrka "LitMiks`24" wjedźe rjad literarneho dorosta dale, kotryž bě dotal pod mjenom "Paternoster" znaty. Je to mjeztym dźesata tajka zběrka. Wona zjednoća teksty 14 awtorkow a awtorow. Pisaja přewažnje wo swojich dožiwjenjach a nazhonjenjach a zmóžnja čitarjej tak dohlad do swěta młodostnych. Knižna premjera budźe 2.decembra w Budyšinje we wobchodźe "Dźěłań dźeń" na Sukelnskej.