Powěsće: štwórtk, 07.11.2024

Regionalne powołanske wiki wyšeje šule Ralbicy su jara pozitiwny wothłós žnjeli. To wuchadźa z naprašnikow, kiž je wjac hač 500 šulerkow a šulerjow, 51 wustajerjow a dalšich 200 hosći direktnje na wikach wupjelniło. Kaž zdźěli sobuorganizator Matthias Klimank, přeje sej wjetšina z wopytowarjow kaž tež wustajerjow, wiki wospjet přewjesć. To maja w Ralbicach tež předwidźane, ale hakle 2026. Klětu koncentruja so na 50-lětne wobstaće kubłanišća.

Dźěłowy plan za lěto 2025 nastajić je wužadanje. To praji regionalna rěčnica Katharina Jurkowa srjedu po posedźenju župneho předsydstwa župy „Michał Hórnik” w Chrósćicach. Pasion, jubilej gmejny Chrósćicy a hłowna zhromadźizna Domowiny w aprylu w Budyšinje su krute wupjelnjace terminy, kotrež maja so wobkedźbować. Dalši dypk na dnjowym porjedźe běchu chronikarjo župy, za kotrež pyta so za hódnej a wožiwjacej přiležnosću, so zaso jónu zetkać a so wuměnjeć. Nimo toho su so wo wobsahach a nowych idejach za webstronu župy kaž tež wo wustupowanju w socialnych syćach rozmołwjeli.

W Slepom wostanje tež w přichodźe samostatne stawnistwo zaměstnjene. To praji wjesnjanosta Jörg Funda na zašłym posedźenju tamnišeje gmejnskeje rady. Na nim bu zdobom sobudźěłaćer gmejny za spjelnjenje nadawkow w stawnistwje wuzwoleny, kiž sej je w přichodźe z dalšej sobudźěłaćerku dźěli. Jedna z dotalneju stawnicow poda so kónc lěta na wuměnk. Pory móža so w Slepjanskim Serbskim kulturnym centrumje, w Rownom na Njepilic statoku a při Brězowskim jězoru zmandźelić.

Ličba njezbožow we Wojerecach je so loni znižiła. To wuchadźa z aktualneje njezbožoweje statiski, kotruž su srjedu w měsće předstajili. Kaž praji sobudźěłaćer města Wojerecy, Götz Gleiche, su loni dohromady 830 njezbožow zličili – 54 mjenje hač 2022. Problem pak su dale njezboža z kolesowarjemi, dokelž je w měsće wjac ludźi kolesujo po puću, ale tež, dokelž so kolesowarjo a kolesowarki často wopak zadźerža, tak Gleiche.

W słowjanskim hrodźišću w Radušu ma so přichodnje kóždy měsac znajmjeńša jedne kulturne zarjadowanje wotměć. Kaž zdźěli nowy wobhospodarjer objekta pola Wětošowa, David Chmelík, ma so Radušanske hrodźišćo tak z turistiskim magnetom stać. Jako přichodne chce čěski předewzaćel Chmelík w decembrje wuhotować słowjanske hody z wikami a pokazkami słowjanskich hodownych nałožkow.