Powěsće: srjedu, 06.11.2024

W Pančicach-Kukowje je nowa komunikaciska arena wosrjedź wsy nimale dokónčena. Betonowej pawiljonaj stej hotowej a trawnik na swjedźenišću zasyty. W přichodnymaj tydźenjomaj maja so štomy zesadźeć, rěka z gmejny. Zarjadować wustajeńcu w jednym z pawiljonow a poswjećić swjedźenišćo chcedźa hakle klětu w nalěću, zo by so trawa přimnyć móhła a zo njeby so zateptała. Projekt za nimale poł miliona eurow financuje so z myta, kotrež su sej wjesnjenjo we wubědźowanju "simulplus-čiń sobu!" wudobyli a ze spěchowanja přez LEADERowu kónčinu. Gmejna trjeba jenož 10.000 eurow přidać.

Gmejna Bóšicy ma na swojich komunalnych ležownosćach něhdźe 250 sadowcow stejo. Tute wišniny, jabłučiny a krušwiny maja so w přichodnych třoch lětach wot Sakskeho zwjazka za hladanje krajiny (DVL) wurězować. Gmejnska rada je so wutoru za to wuprajiła. Dźakowano spěchowanskemu programej njetrjeba gmejna ničo připłaćić. Tež priwatni wobsedźerjo sadowych štomow móža so, tak wjesnjanosta Stani Ryćer, pola zwjazka wo darmotne wurězowanje prócować.

Wot srjedy poskića rěčna motiwatorka projekta ZARI, Rafaela Wićazowa, zhromadnje z Radworskej staršiskej iniciatiwu nowy měsačny poskitk. Tutón měri so na staršich, kotrychž dźěći serbšćinu w kubłanišću wuknu. Rěčna hodźina słuži k informaciji a skići wotmołwy na prašenja kołowokoło nawuknjenja serbšćiny. Nimo toho su tež praktiske zwučowanja za staršich předwidźane, zo móhła so rěč w swójbach skrućić.

Kraj Sakska podpěruje gmejnu Slepo při financowanju wopłočkowych naprawow. Kaž zdźěli wjesjnanosta Jörg Funda wutoru na posedźenju gmejnskeje rady, staji kraj Sakska 2,2 milionaj eurow k dispoziciji. Kónc oktobra je gmejna Slepo wot Sakskeje zdźělenku wo spěchowanju dóstała. Kónc 2025 maja twarske dźěła wokoło wopłočkow w Slepom, Rownom, Mułkecach a w Trjebinku zakónčene być.

W braniborskim Frauendorfje, bjezposrědnje při hranicy k Sakskej, bě wutoru prěni zaryw za nowy wodowód. Z pitnej wodu zastaruja tež gmejny a zawody w sewjernej Sakskej, mjez druhim mlokarnju Sachsenmilch w Leppersdorfje abo město Kamjenc a wokolinu. Kaž praji sobudźěłaćer Wodoweho zwjazka Łužica, je tuchwilny wodowód 70 lět stary a ma so ponowić. Hač dosrjedź februara ma nowa roła składźena a syći pitneje wody přizamknjena być.