Powěsće: póndźelu, 04.11.2024

Zhromadnje ze 400 hosćimi je Serbska rejowanska skupina Smjerdźaca sobotu wječor w Chrósćicach swoje 60-lětne wobstaće woswjećiła. Nimo wulkeje skupiny wuhotowachu tež dorostowa skupina a dalšej cyłkaj nic wjace aktiwnych něhdyšich rejowarjow program. Tež skupinka Serbskeho folklorneho ansambla Wudwor gratulowaše z reju. Na kóncu programa rozžohnowachu dołholětneho choreografa Dietera Wendischa. Tuchwilu nawjeduje cyłk baletny mišter Kornel Kolembus. Přichodny termin za Smjerdźečanow je Zeleny tydźeń w Berlinje w januarje.

Nowu wustajeńcu „Wěrywuznaće w drjewje“ z wudźěłkami drjeworězbarja Mikławša Dyrlicha z Noweje Wjeski su zašłu sobotu w Budyskej Serbskej kulturnej informaciji wotewrěli. Syła ludźi bě přichwatała, zo by powědanju Mikławša Dyrlicha wo swojim puću k rězbarjenju připosłuchała, sej wustajene wudźěłki wobhladała a z wuměłcom-rjemjeslnikom pobachtała. Z pisanym programom je dujerska kapała Horjany wotewrjenje wobrubiła a po tym nimale 70 wopytowarjow na połnej žurli Serbskeho domu, mjez druhim z premjeru spěwa "Čampać", při nazymskim koncerće zawjeseliła.

Mjez Kamjencom a Drježdźanami jězdźa wot póndźele ćahi popołdnju zaso w połhodźinskim takće. Kaž wobchadny zwjazk Hornje Łobjo zdźěli, su z tym narunanske jězby z busami zbytne. Wot póndźele do pjatka jězdźi z tym zaso do kóždeho směra pjeć ćahow wjace. DB Regio bě jězbny plan před lětomaj skrótšił, dokelž pobrachowaše po słowach předewzaća personal. Wot toho časa su so sylnišo wo to prócowali, nowych fachowcow zdobyć a wukubłanje polěpšić, praji rěčnica železnicy. Tute naprawy su nětko na dobro pasažěrow.

Wjace hač 30 ludźi je so zajimowało za stawizniski přednošk Trudle Malinkoweje w Rakečanskej farskej bróžni wo serbskich wupućowarjach w 19. lětstotku. Připosłucharjo njezhonichu sobotu jenož, zo su serbske korjenje w Awstralskej a w Americe hač do dźensnišeho prezentne, ale tež, zo wobsteja serbske swójbne mjena tam přeco hišće w pjatej abo šestej generaciji. Trudla Malinkowa mjenowaše tute wsy "kupa našeje domizny we wukraju". Na serbski wječor přeprosyła běše ewangelska wosada, kotraž přednošk w rjedźe wječornych zetkanjow pod hesłom “Swjatok” organizowaše.

Na prěni tak mjenowany 100 kilometrow dołhi "Krabatowy ultra-běh" je so sobotu 61 běharkow a běharjow z cyłeje Němskeje podało a jedyn běhar z Nižozemskeje. Start a cil běštej na sportnišću w Ćisku pola Wojerec. Po starće rano w šesćich je cil wječor w dźewjećich jenož 44 sportowcow docpěło. Pola žonow doby Manuela Lenkowa z Gródka a pola muži Ralf Gundermann z Jeny.