Powěsće: wutoru, 05.11.2024

Zawod ZIEGLER w Pěskecach je jeničke předewzaće z Hornjeje Łužicy, kotrež wobdźěli so na mjezynarodnych wikach SmartCityExpo w španiskim měsće Barcelona. Hač do štwórtka zaběraja so tam z inowatiwnymi konceptami a technologijemi, kotrež zmóžnjeja na přikład naslědnu mobilitu a z tym lěpšu žiwjensku kwalitu w městach přichoda. Nimo Zieglerec zawoda zastupuja tam Saksku tež wjacore předewzaća z Lipska a Drježdźan. Wobdźělenje na wikach organizuje sakske ministerstwo za hospodarstwo, dźěło a wobchad.

Ewangelska wosada w Klětnom spomina tele dny na 35. róčnicu wuchowanja swojeje wsy. Tehdy měješe so Klětno brunicy woprować a wotbagrować, přećiwo čemuž bě sta wobydlerjow, tež z wokolnych wsow, tydźenje dołho měrliwje demonstrowało. Hinak hač před 35 lětami, po słowach ewangelskeho wosadneho fararja Daniela Jordanova, dźensa hižo nichtó zajim za to serbske we wsy nima. Posledni Serb - komponist Hinc Roy - zemrě w lěće 2019. Wopominanski tydźeń składnostnje měrliwych demonstracijow skónči so na tutej kermušnej njedźeli ze swjatočnymi kemšemi w Klětnjanskej ewangelskej cyrkwi.

Hornjołužiske kliniki swój mediciniski poskitk w přichodnych lětach předewšěm w Budyskej chorowni rozšěrja. To předwidźi tak mjenowana mediciniska strategija 2030, kotruž su póndźelu w sprjewinym měsće předstajili. Kaž praji jednaćel Budyskich chorownjow Jörg Scharfenberg, su hižo započeli wotrjad za starobnu medicinu w domje etablěrować. Dale chcedźa kompetencny centrum za wutrobowu medicinu rozšěrić. Zo móhli potrjebu na hladanskim personalu w Hornjołužiskich klinikach zaručić, prócuja so wo fachowcow z wukraja, mjez druhim z Chiny, Brazilskeje, Usbekistana a z Filipinow. Zdobom Scharfenberg připowědźi, zo chcedźa wot kónca lěta 2025 hladarjow a hladarki w swójskej šuli wukubłać.

W skale w Lěskej inwestuja dobrych wosom milionow eurow za mašinu, kotraž kamjenje łama. Wona je takrjec wutrobno skały a rozdźěła rozbuchanu kamjeniznu. Stara mašina pochadźa po informacijach zawoda z lěta 1968, a bě z tym hustohdy skóncowana a je wjele miliny přetrjebała. Nowa mašina čini nimo toho mjenje hary a z njej nastanje mjenje procha. W tutym měsacu započnu z twarskimi dźěłami za mašinu, praji jednaćelstwo. Klětu w awgusće ma hotowa być.

W sewjernej Hornjej Łužicy žadyn kónčny skład za atomowe wotpadki njenastanje. Zwjazkowa towaršnosć za kónčne składy BGE je kónčiny wokoło Njedźichowa, Niskeje a Běłeje Wody jako so njehodźace zastopnjowała. Jako přičinu mjenuja, zo so póda ze šěrawca, sedimentnych a hlinjanych kamjenjow w tutych kónčinach za skład wysoko radioaktiwnych maćiznow njehodźi. Cyle pak kónčiny z pytanja za składom njespušća. Z wědomostneho wida pak njeje prawdźepodobne, zo tam kónčny skład nastanje, ze zarjada zdźělichu. Dalše kónčiny w Hornjej Łužicy pak dale přepytuja.