Dundak bě zaso raz po puću: Nowy hip hop z Radworskej dźěćinu

Lube dźěći, witajće! Jenož hišće někotre dny do šule - potom je skónčnje tak daloko: šěsć tydźenjow dołho so wuspać, po wječorach hawronić, lód lizać a do wody skakać. To sće sebi tež woprawdźe zasłužili, po telko wužadanjach w šuli.

Tema hip hop: Pětr Dźisławk wot skupiny Nowa Doba je so před něšto časom za małymi talentami rozhladował. Wón měješe mjenujcy nadawk, za Radworski experiMINT-campus hymnu abo spěw napisać. A tak su so dźěći loni z nim na campusu zetkali, su z Pětrom Dźisławkom zhromadnje zwučowali a spěw nadźěłali. Spěw z mjenom "Radworska dźěćina" steji na wšěch znatych streamingowych platformach, hdyž zapodaće "Nowa Doba".