Zeserbšćenje kompjuterowych hrow móžno?
Hauptinhalt
27. pražnika 2023, 09:31 hodź.
Mjeztym su prěnje generacije, kiž su w dźěćatstwje z digitalnymi hrami wotrostli, dorosćeni a pokaza so, zo lěto a wjace z nich kompjuterowym hram swěrni wostanu. Měrćin Wjenk je sej hru „Pjeć magiskich amuletow“ wobhladał, kotrejež serbski přełožk bě Załožba za serbski lud spěchowała. Wón pak bě přesłapjeny, technika a hrajny princip stej chětro zestarjenej. Tohodla je so raz prašał, kak ćežko da to technisce je, hdyž aktualne hry zeserbšćiš.
Wobdźěłanje kompjuterowych hrow – to bě při někotrych hrach lóšo hač wočakowane. Zdźěla wšě trěbne informacije a teksty tak předleža, zo móžeš je z jednorym tekstowym editorom změnić, kaž jón na kóždym ličaku maš. Wuspytał je to naš redaktor Měrćin Wjenk z dyrdomdejskej hru "Pillars of Eternity" z lěta 2015 a ze strategiskej hru "Crusader Kings III" wot 2020, kotraž bě wosebje loni na Youtube a Twitch jara woblubowana. Je prosće raz menije a někotre tekstowe kašćiki w datajach změnił, štož je potom hnydom w hrě samej wupruwował. Wězo, puć k dospołnemu přełožkej je jara dołhi, to pak zaleži na mnóstwje teksta. Techniska strona, potajkim prawe dataje namakać, je tróšku wobdźěłać a na kóncu wuspytać hač wšo funguje njeje ani dwě hodźinje trało.
Je to poprawom přeco tak jednorje?
To wotwisuje woprawdźe wot hry. Tak su hižo před 20 lětami we Wotrowskim młodźinskim klubje za strategisku hru "Age of Empires 2" serbske zwuki zhotowili. Tehdy bě wobdźěleny na tym Clemens Škoda:
Poprawom bě zeserbšćenje hry "Age of Empires 2" jara lochke. Sym prosće te němske mp3-dataje ze serbskimi wuměnił. To rěka, powjerch bě wostał němski, ale zwuki běchu zdźěla serbske.
Pola tamnych hrow trjebaš zaso přidatne programy, zo by dóstał přistup k tekstowym a rěčnym datajam. Ale programěrowanske znajomosće za tajki přełožk zwjetša trěbne njejsu. Mamy tu potajkim dotal lědma wužiwany potencielny rěčny rum za dźěći a młodostnych. Ale, to hišće jako dodawk, tajke wobdźěłanje je dotal jenož na kompjuteru móžne. Za konsole kaž Playstation a Xbox a aplikacije na šmóratku to tak jednorje móžno njeje.
Modding so tute wobdźěłanje kompjuterowych hrow tež mjenuje, tola kak je to scyła prawnisce z tym?
Modding njeje zakazane a za njón njejsu tež žane přidatne licency trěbne. Haj, husto jón producenća hrow samo witaja a wuraznje podpěruja. Na přikład z tym, zo techniske programy za manipulaciju swójskich hrajnych datajow wozjewja a w interneće rozkładuja, kak swójske mods a přełožki jenož njezhotowiš, ale je tež wozjewiš. Jenož pjenjezy z tajkimi mods zasłužić njesměš. Jeli je wozjewiš, dyrbiš to darmotnje činić.
Su da tajke přełožki do mjeńšich rěčow načasnych hrow jenož móžne, hdyž zakładne dataje přepisuješ?
Nic jenož. Wozmjemy raz jako přikład "Minecraft", hra kotraž bu tak husto předata kaž žana druha na swěće. Za přełožk abo lokalizaciju, kaž to při přełožkach za software rěka, su w interneće wulku datowu banku za wšě móžne rěče zawjedli. Tam móža so wšitcy zajimcy wobdźělić, na přikład starši, kiž chcedźa zo jich dźěći w přichodźe "Minecraft" serbsce hraja. Hišće njeje nichtó hornjo a delnjoserbšćinu zapodał, za to pak na přikład kašubšćinu a samo łaćonšćinu. Pohladajće raz tule.
Kotre hry da móhli a měli so přełožić?
To drje budźe ći kóžda hrajerka a kóždy hrajer cyle po swojim słodźe něšto druhe rjec. A wobjim modernych hrow drje zamóžnosće jednotliwych entuziastow přesahuje. Móhł pak sej tajki přełožk hry jara derje jako multimedialny a předmjety přesahowacy projekt za šule a medijowu etažu w Serbskim domje předstajić. Skupina šulerkow a młodostnych móhła so sama na hru dojednać a so potom pod nawodom do dźěła dać. To maš na jednym boku informatiski, medialny podźěl: Hdźe namakaš dataje, kak je wobdźěłaš a do hry zatwariš a potom dyrbiš to wězo wuspytać. A na tamnym boku zaběraš so při tym intensiwnje ze serbšćinu.
