Rěčny kućik dr. Jany Šołćineje z wusyłanja 10.03.2010 po wobchodach běhać abo chodźić?

Njedawno diskutowachmoj ze serbskej žurnalistku wo tym, kak Serbja nakupuja – hač woni po wobchodach běhaja abo chodźa. Wužiwanje wotpowědneje werbalneje formy zwisuje z kontekstom, je tuž stilistiskeho rozdźěla. Słowjeso chodźić je neutralne, prajimy na přikład chodźu na dźěło abo chodźu po lěsu. W zwisku z chodźenjom abo běhanjom po wobchodach wobsteji snano rozdźěl mjez mužemi a žonami, kotryž měri so na wašnje nakupowanja. Je to potajkim emocionalny rozdźěl, wšako humorisća sćěhowace twjerdźa: mužojo chodźa direktnje a zaměrnje po wobchodach a kupuja to, štož trjebaja. Žony hinak nakupuja: wone skerje po wobchodach běhaja, hladaja tu – a hladaja tam, běhaja tam a sem – a zaso wróćo. Móžemy tež po wobchodach dundać, a snano někotryžkuli muž ekspresiwnje twjerdźi, zo jeho žona nastajnosći po wobchodach łazy abo lěta. Ženje pak prajić njemóžemy: po wobchodach hić, tuta forma je prosće wopačna!