Rěčny kućik dr. Sonje Wölkoweje z wusyłanja 04.03.2009 Rostlinarnje

Nalěćo so bliži a nam so chce zaso čerstweje zeleniny z Łužicy – na přikład Hamorskich kórkow. W powěsćach so tu njedawno rozprawješe, zo so tam w zahrodkarnjach kórkowe rostliny plahuja. Što su zahrodkarnje? Někajke městnosće, w kotrychž su zahrodki? Ně, ně dźe wo škleńčane domy za plahowanje zažneje zeleniny a kwětkow. Tola tu je so w serbšćinje dawno etablěrowała twórba „rostlinarnja“ – je to wotpowědnik za němske Gewächshaus a zdobom za Treibhaus. To wšak je poprawom to samsne, jenož zo je pomjenowanski motiw wšelaki: Jónu dźe wo to, zo su w tych škleńčanych domach rostliny – Gewächse, a jónu wo to, zo maja so w nich z pomocu ćopłoty a zdźěla přidatneho wobswětlenja rostlinki zašo wuwić. Gewächshausgurken abo Treibhausgurken móžemy tuž mjenować kórki z rostlinarnje – ja so hižo na prěnje čerstwe kórki z regiona wjeselu, mjeztym wšak samo hižo prěnje kórki šćipaja.