Rěčny kućik dr. Anje Pohončoweje z wusyłanja 25.02.2009 křćeńca – křćizna – kolańca

W křesćanskich swójbach je z wašnjom, zo so nowonarodźene dźěći wukřćija. Starši přeproša tuž hosći na křćeńcu abo křćizna abo tola na kolańcu? Jedna so pola tutych słowow wo rěčne warianty abo wo wšelake wěcy? Słowo křćeńca, kotrež po wurjekowanju wariěruje, na př. jako šćeńca abo kčenica, wustupuje w cyłym hornjoserbskim teritoriju a měnjene je z tym konkretny akt w cyrkwi, potajkim sakrament křćeńcy. Porno tomu poćahujetej so słowje křćizna a kolańca na swójbny swjedźeń, kotryž so křćeńcy přizamknje. Mjeztym zo wužiwa so słowo kolańca (a warianty kaž kolaceja, kolańcja) na zapadźe hornjoserbskeho rěčneho teritorija kaž w Chrósćicach a Ralbicach, je słowo křćizna rozšěrjene na wuchod tutych wjeskow, na př. w Bóšicach abo Komorowje kaž tež wokoło Budyšina. Słowo křćizna je pluralowe słowa, rěka potajkim: Pobych na křćiznach. Křćizna so w spisownej rěči husćišo wužiwa hač wuraz kolańca, štož zwisuje z tym, zo bazuje hornjoserbska spisowna rěč na Budyskim dialekće. Wězo njeje wopak, tež w spisownorěčnych tekstach słowo kolańca wužiwać.