Rěčny kućik dr. Jany Šołćineje z wusyłanja 26.11.2008 Prepozicija k

Pod wliwom němčiny wužiwaja so w serbšćinje druhdy prepozije, hdźež w serbšćinje njesłušeja. Njeje to nowy zjaw. W časopisu "Łužičan" namakach w lětniku 1861 kritiku w rubrice "Rjedźer a porjedźer", kotraž měri so na njekorektne wužiwanja prepozicije "k". Přikładow za to je tójšto. Tež dźensa čitamy abo słyšimy sady kaž: "to njeje k wutraću", abo "to njeje k dóstaću". Konstrukcije z němskim "zu" kaž "Das ist nicht zu sehen" su so formalnje z pomocu prepozicije "k" do serbšćiny přełožili, a jej přistaji so werbalny substantiw: "To njeje k widźenju", abo "Tebi njeje k pomhanju". Lěpje ma tuž rěkać, zo "to widźeć njeje", abo "tebi njeje móžno pomhać", abo tež "to njeje wutrać", "tu su na přikład knihi dóstać". Formy z prepoziciju "k" su so mjeztym etablěrowali, njemóžemy tuž prajić, zo su wopačne. Ale formy bjez prepozicije wotpowěduja lěpje werbalnemu stilej zwuraznjenja serbšćiny.