Rěčny kućik Marka Grojlicha z wusyłanja 29. awgusta 2007 Wjesne mjeno Trjebin/Trjebjeńca

Trjebjeńca a Trjebin – z Trjebjeńcy njedaloko Bukec, potajkim na kromje łužiskich horow, hač do Trjebina pola Slepoho je runu smuhu na sewjer tak někak 40 kilometrow. W Trjebjeńcy rěčachu wuchodnu, Budysko-Lubijsku serbšćinu, w Trjebinje rěča slepjańsce!
A tola matej wobě wsy něšto zhromadneho, mjenujcy pochad mjena. Naši prjedownicy su w Slepjanskej holi a pod Čornobohom lěs trjebili – štomy pušćeli, zo bychu rum za pola a chěžki měli. Tón Trjebin w Slepjanskej wosadźe rěka tež němsce tak – Trebendorf – nó haj, tu němsku "wjes" připowěsnychu mjenu pozdźišo. Hinak je to z Trjebjeńcu w Bukečanskej wosadźe. Wona so prěnjotnje naspomni jako Trebnitz – ale na kóncu 16. lětstotka jewi so přeněmčena w aktach Budyskeho tachantstwa jako Steindörfel. A hdyž hižo wo trjebjenju – pušćenju lěsa – powědach, tak dodam, zo rěka lěsny puć njedaloko Trjebjeńcy, wuchodnje Noweho Wuježka dźensa hišće Trjeba abo połněmsce Trebe.