Rěčny kućik dr. Jany Šołćineje z wusyłanja 11. julija 2007 Wotować abo tola wothłosować?

W němskich medijach słyšiš dźeń a husćišo, zo so něhdźe "wotuje". W serbšćinje so tajka požčonka hišće zadomiła njeje; w Serbach so potajkim hišće wothłosuje. Podobnje je z dalšimi přikładami. Sym runje prajiła, zo su so přikłady zadomili, njejsym wužiwała cuzy wotpowědnik, "zo su so wone etablěrowali".
Mjenowany zjaw njeje nowy. Hižo w zašłym lětstotku wužiwachu so tež mjezynarodne werbalne formy: werby so tež tehdy hižo konjugowachu a skłonjowachu, a w šuli so znamkowaše a cenzurowaše. A tež dźensa móžemy někoho kritizować abo porokować. Móžemy někoho konsultować, abo so prosće naprašować; konterować abo tež znapřećiwić. Tuchwilu dóstawa so nadpadnje wulka ličba werbalnych požčonkow do němskeje rěče, a přez němčinu tež do serbšćiny. Požčonki drje tež we wěstych konstekstach wužiwamy, ale paralelnje eksistuja tež serbske wurazy, kotrež měli tež dale wužiwać: tak na př. běhamy město zo joggujemy, dale dźěłamy a njejobbujemy, hospodarstwo dźeń a bóle rozkčěwa a njeboomuje, a móžemy něšto darić abo někoho podpěrować město zo něšto abo někoho sponsorujemy.