Rěčny kućik z wusyłanja 23.09.2005 Torońca

W lěću sym wam, lubi słucharjo, tu w rěčnym kućiku skrótka předstajił wjesku Zrěšin – němsce Rieschen, tam pod horami južnowuchodnje Budyšina. A sprawnje prajene, při tym sym na Torońcu zabył. Štóž chce mjenujcy do Zrěšina, jědźe najprjedy do Raboc a potom přez wonu Torońcu – němsce Daranitz, do Zrěšina.
A TOROŃCA je tola woprawdźe jakne praserbske, njeněmske mjeno! Někak zwisuje z "torhanjom" – nic tak, zo bychu so ludźo wo to torhali, w Torońcy bydlić směć, dokelž je tam rjenje – to drje nic, ale prěnje naspomnjenje jako Torgawitz abo Torgenitz pokaza na to, zo twarichu so prěnje domčki do roztorhaneje, njeruneje krajiny . Tajka tam pod horami je! Móžno pak tež, zo je Milčan z mjenom Torhan wjes załožił, ale tute mjeno zwisuje tež někak z torhanjom. Snadź je wón po serbskim wašnju ze zadkom spotorhał, štož je z rukomaj natwarił!
A Jasčanam nětko hišće přeradźu, zo jich Jaseńca jenička njeje - někak kilometer zapadnje Torońcy je tohorunja Jaseńca, ale tute sydlišćo je jara małe, jenož jedne něhdyše ryćerkubło w horatej krajinje!