Rěčny kućik z wusyłanja 07.09.2005 Laufzeit

Namakach před dlěšim časom w našim póštowym kašćiku cedlu, z kotrejž chcyše někajki zastupnik wabić za lutowanski plan swojeho zawěsćenja. Běžny čas tutoho lutowanskeho zrěčenja bě wusměrjeny na pjeć lět. Dźe mi wo wuraz běžny čas w tutym konteksće. Měnjene bě němsce "Laufzeit". Słowo "Laufzeit" móžu w němčinje we wšelakich kontekstach wužiwać, na přikład w sporće: Běžny čas sportowca je so w poslědnim lěće wo tójšto polěpšił. W zwisku z filmami rěču wo hrajnym času abo hrajnej dobje resp. jeli chcu prajić, kelko mjeńšin film běži, rěču wo dołhosći filma. A někotre techniske připrawy funguja jenož wěsty čas, jich čas fungowanja wučini snano tři lěta. Pytnjeće potajkim, lubi přisłucharjo, zo dyrbju němske słowo "Laufzeit" wotwisujo wot konteksta wšelako přełožić. W zwisku z kreditom abo nastupajo zrěčenje, kotrež na spočatku naspomnich, je lěpje prajić čas płaćiwosće. Móžu plan za lutowanje wotzamknyć, zrěčenje płaći pjeć lět resp. čas płaćiwosće tutoho zrěčenja wučini pjeć lět.