Rěčny kućik z wusyłanja 26.08.2005 Kluka

Što je jedna kluka? Tak sym so njedawno w kruhu kolegow naprašowała. Słowo wopokaza so jako mało znate. Někotři znajachu je jako pomjenowanje za patu, potajkim kokoš, kotraž na jejach syda abo hižo swoje ćipki wodźi. Z tajkim woznamom je słowo kluka na přikład tež w Rězakowym słowniku zapisane. Tola mi dźe wo něšto druhe: mjenujcy wo něšto techniske. Je to mjenujcy stare a tradicionelne serbske słowo za to, štož dźensa zwjetša po němskim mjenujemy kurblu – potajkim zhibowany dźěl, kiž słuži k ručnemu wjerćenju někajkeho aparata. W Pawoła Grojlichowych dopomnjenkach jewi so na přikład kluka wot runksmošiny – mašiny k rozdrobnjenju rěpy za picu. Naša wowka tajku mašinu měješe, ale bjez kluki – wona běžeše z motorom. A rozšěrjenje motorizacije drje je tež přičina, zo je so hromadźe z ručnje wjerćanymi nastrojemi tež naše serbske słowo kluka pozabyło.