Rěčny kućik z wusyłanja 20.05.2005 Dwójne - dwoje

Na sportowej stronje w nowinach steješe njedawno, zo je na foće widźeć "třělc dwójnych wrotow" za swoje mustwo. Prawdźepodobnje je był třělc dwójce wuspěšny, ale při wšěm ma prawje rěkać, zo je wón dwoje wrota třělił a nic dwójne. Wokno móže měć "dwójnu škleńcu" a móžemy wupić pjeć "dwójnych palencow" – stajnje pak je woznam słowa "dwójne" - "doppelt". W našim padźe tež němsce prajić njemóžemy, zo bě hrajer někajki "Doppeltor" docpěł. Hdyž chcemy potajkim wrota ličić, potom prajimy, zo je něchtó dwoje, troje abo samo štwore wrota třělił. Wěcowniki, kotrež w singularje njewustupuja, kaž wrota, durje, nožicy atd., wužiwamy zasadnje z numeralijemi. Dwójny, trójny atd. pak wužiwamy za pomjenowanje wjackrótnosće samsneje wěcy abo tež wosoby a tohodla tež prajimy, zo ma něchtó dwójnikow/dwójniki abo samo trójnikow/trójniki.