Rěčny kućik z wusyłanja 04.02.2005 Linksruck - wobrot na lěwo

Dźensa přiwobroćimy so temje z wobłuka politiki. W zwisku z poslednimi wólbami do krajneho sejma dyrbjachmy w zwisku z wuslědkami konstatować zjaw, kotryž so w němskich medijach pomjenuje ze słowom "Rechtsruck". Runje tak so wužiwa za wopisowanje tendency do nawopačneho směra "Linksruck". Kak wobaj zjawaj nětko serbsce pomjenujemy?
Słownik nam w padźe "Ruck" dale njepomha, wšako so tam jenož słowo "stork" jewi. Lěpši namjet so namaka pod hesłom "ruckartig", hdźež steji mjez druhim "njejapki wobrot". Tuž namjetuju za wopisowanje zjawa přesunjenja mocy pak nalěwo pak naprawo: "wobrot nalěwo resp. naprawo", abo: "tendenca naprawo resp. nalěwo". Jedna-li so wo konkretny wuslědk wólbow, potom namjetuju leksikaliske wopisowanje "přiběranje prawicarskich resp. lěwicarskich hłosow", abo tež "zesylnjenje prawicarskeho resp. lěwicarskeho wliwa". Dalše móžne pomjenowanje je tohorunja "přesunjenje nalěwo abo přesunjenje naprawo". Kaž prajene, nochcu hódnoćić, dźe tule jeničce wo pomjenowanje woneho zjawa.