Rěčny kućik dr. Anje Pohončoweje z wusyłanja 13.01.2011 Gebrauchsanweisung

Jedyn abo druhi z Was, lubi připosłucharjo, je snadź dóstał k hodam někajki techniski aparat darjeny. Kóždemu wužiwarjej so doporuči, zo njech sej do prěnjeho wužiwanja najprjedy jónu přečita „gebrauchsanweisunku”. Kak pak prajimy k tomu najlěpje serbsce? Němčina wužiwa nimo „Gebrauchsanweisung” tež „Gebrauchsanleitung” abo „Bedienungsanleitung”. Tuž móžemy serbsce prajić nawod k wužiwanju resp. k posłužowanju abo nawod za wužiwanje resp. za posłužowanje. Móžno je tež pokiwy k wužiwanju abo k posłužowanju. Wot substantiwow wužiwanje resp. posłužowanje hodźi so tež adjektiw wotwodźeć, tak nastanje serbski wotpowědnik wužiwanski nawod resp. posłužowanski nawod. A štóž lubuje cuze słowa, móže serbski nawod wuměnić ze słowom instrukcija. Pola někotrych nastrojow hižo njedosaha łopjeno, na kotrymž je wšitko napisane, ale trjebaš k tomu knižku, a tu bychmy móhli pomjenować přiručka za wužiwanje resp. za posłužowanje. – Nětko znajeće serbske wotpowědniki a móžeće je wužiwać. Hač Wam tole pomha, tež tekst tajkeho wužiwanskeho nawoda rozumić a nastroj prawje wužiwać – to je zaso cyle druha wěc.