Mjeńšina serbšćiny 29.01.2025 z dr. Janu Šołćinej: Rěčny kućik - dawki płaćić

Dawki płaćić

Wšitcy mamy dawki płaćić: za swoje dochody, za bencin, tež nowy a změnjeny dawk na ležownosć, němsce: „Grundsteuer“ a samo za psa. W tutym zwisku rěčeše njedawno něchtó wo psyčim dawku, němsce „Hundesteuer“, štož bych hornjoserbsce skerje jako dawk za psa pomjenowała, dokelž ma wobsedźer psa za swojeho lubuška wěstu sumu zapłaćić. Zawěsće su někotři z Was, lubi słucharjo, samo hižo swoju dawkowu deklaraciju za minjene lěto zhotowili a tam podali, za kotre dochody maće dawk resp. dawki płaćić. Němski wobrot „etwas versteuern“ móžemy tuž wopisować a prajić, zo mamy za wěste dochody dawki zapłaćić. W interviewje telewizijneho wusyłanja wužiwaše njedawno młody Serb werbalnu formu a praješe, zo so „stipendij zdawkować njetrjeba“. Forma zdawkować je kreatiwna nowotwórba, kotraž je hižo w portalu „soblexx“ jako ekwiwalent němskeho „etwas versteuern“ zapisana. A zo tematika płaćenja dawkow hižo našich serbskich prjedownikow zaběraše, pokaza dokład w „Přisłownym leksikonje“ z lěta 1902, kiž rěka: „Dawaj dawki, sam jěs pawki“.))

dr. Jana Šołćina