Rěčny kućik 11.09.2024 z dr. Anju Pohončowej: Rěčny kučik - Serbscy studowacy a serbske studowace

Hdyž počeše so před někotrymi lětami dźenderowanje w serbšćinje jewić, orientowachu so přiwisnicy toho zjawa husto po němčinje – wšak je němčina najbliša a najsylniša kontaktna rěč serbšćiny. Po přikładźe němčiny wustupuja naraz wo wjele husćišo substantiwizowane participy město substantiwow, na přikład město generiskeho maskulinuma studenća abo dwójneho pomjenowanja studenća a studentki wužiwa so husto particip studowacy. Gramatisce widźane je tole pak tež jenož muska forma (kaž studenća), wšak rěka nominatiw plural participa, kotryž so na žony poćahuje, studowace. Podobny rozdźěl dyrbi so činić, hdyž steji particip w akuzatiwje plurala, tež potom mam žónsku participowu formu ekstra mjenować, runje tak kaž je to při wužiwanju substantiwow student resp. studentka Woni přeprošuja wšitkich serbskich studowacych a wšitke serbske studowace. W tajkich kontekstach potajkim njepřinjese wužiwanje participowych formow žanu lěpšinu porno wužiwanju substantiwow studenća resp. studentki. Serbšćina njeje němčina, ma hinašu gramatisku strukturu. Na to měło so při dźenderowanju dźiwać.

dr. Anja Pohončowa