Rěčny kućik 07.08.2024 z dr. Leńku Šołćić: Rěčny kućik - přeprošenje

Serbja rady swjeća. A k wěstym přiležnosćam, kaž njedawno k šulskemu zastupej, dyrbja so do toho přeprošenja pisać. Tu so mje ludźo přeco zaso prašeja: Rěka to wutrobnje će přeprošuju abo wutrobnje će přeprošu? Kotra forma werba je gramatisce w spisownej rěči prawa? Dźe wo tak mjenowany aspekt pola werba. Přeprošować (přeprošuju) je imperfektiwny abo njedokonjany aspekt, přeprosyć (přeprošu) pak perfektiwny abo dokonjany aspekt. Poprawom wšak je w spisownej serbšćinje tak, zo smě so za zwuraznjenje aktualneje přitomnosće jenož imperfektiwny werb wužiwać, potajkim nic Ja runje tekst přełožu, ale Ja runje tekst přełožuju. W padach tak mjenowaneje koincidency kaž w našim přeprošenju, to rěka, hdyž so to, štož so w sadźe wupraji z wuprajenjom runočasnje realizuje, móža pak so tež perfektiwne werby wužiwać, potajkim, přeprošu. A na přikład tež: slubju ći, zakazam ći, přiznaju a dalše.

dr. Leńka Šołćić