Rěčny kućik 31.07.2024 z dr. Janu Šołćinej: Rěčny kućik - bjezpłatne piwo

W Serbskich Nowinach čitach njedawno nawěšk, w kotrymž bě něchtó slubił wšěm, kiž so pod wozjewjenym telefoniskim čisłom přizjewja, swobodne piwo. Wězo wědźach, zo bě wosoba měniła to, štož so němsce jako „Freibier” pomjenuje. Móžu prajić, zo mam dźensa swój swobodny dźeń, wjele swobodneho časa, abo zo je něhdźe městno swobodne – ale piwo zawěsće swobodne njeje! Prawdźepodobnje je chcyła anonymna wosoba w nawěšku zwuraznić, zo potencielnym zajimcam piwo wuda, zo piwo sami zapłaćić njetrjebaja, zo je tute za nich bjezpłatne abo darmotne, štož je wězo zwjeselace! Znajemy dalše konteksty, w kotrychž so w serbšćinje kajkostnik swobodny njekorektnje wužiwa. Tak čitam abo słyšu, zo chcedźa šulerki abo šulerjo po wotchadničce najprjedy raz swobodne socialne lěto absolwować, za kotrež so w němčinje skrótšenka FSJ wužiwa. Tole wězo njetrjechi, dokelž lěto swobodne njeje, wšako maja šulerki a šulerjo w běhu lěta pilnje dźěłać a so socialnje angažować.

dr. Jana Šołćina