Rěčny kućik 17.01.2024 z dr. Janu Šołćinej: Rěčny kućik: zhromadna šula

Dźensa so w „Rěčnym kućiku” z tematiku šulstwa zaběram. Pomjenowanja za šulske družiny w Sakskej su etablěrowane a wěmy, što su zakładna a wyša šula abo gymnazij. W zwisku z aktualnymi diskusijemi wo šulskich strukturach mjenuje so husto němska zestajenka „Gemeinschaftsschule”, kotrejež serbski přełožk w dwurěčnych słownikach hišće zapisany njeje. Za słowo „Gemeinschaft” namakamy serbski ekwiwalent zhromadźenstwo, a tuž bychmy móhli prajić, zo jedna so wo zhromadźenstwowu šulu. Přećiwo tajkemu postupowanju pak rěči, zo so wšitke kompozita, kotrež su z prěnim čłonom zestajenki „Gemeinschaft-” tworjene a w dwurěčnych słownikach dotal zapisane, w serbšćinje z pomocu kajkostnika zhromadny tworja. Motiw zhromadneho wuknjenja šulerkow a šulerjow hač do 8. lětnika hraje tež w tutym zwisku rólu, a tuž ma so wona šulska družina jako zhromadna šula pomjenować. Pytanje w tekstowym korpusu tole potwjerdźi. Tam je w zwisku z rozprawnistwom dokoławokoło „Wěteńčanskeje iniciatiwy“ hižo mnoho dokładow za pomjenowanje „zhromadna šula“ - a tak mam wony přełožk tež za dobre rozrisanje rěčneho prašenja!

dr. Jana Šołćina