Nowonakład planowany: Retro handije tež pola młodźiny "in"

Dopomniće so snano hišće na tutón handy? Je to legendarny Nokia 3210 - poł kosće, poł cyhela, tak dźensa na njón někotři zhladuja. Ale běše chětro stabilnje twarjeny a kóždy chcyše jón spočatk 2000tych lět měć. A to njebě žane šmóratko. Přetož tute tehdy hišće wulce njeeksistowachu – prěni iphone wšak bu hakle 2007 předstajeny. Wiki dominowachu za to mobilne telefony z kneflemi, bjez wulkich kamerow a tež bjez někajkeho touch displaya. A runje tajke modele su nětko zaso en vogue.

A to njejsu jenož seniorojo, kiž tajke jednore telefony wobsedźa. Za nich wšak dawaja ekstra modele z wjetšimi kneflemi. Wuwiwarjo pak su mjeztym za tym přišli, zo so tež młódša generacija za nje zajimuje. A tak ma lětsa po 25 lětach dalši nowonakład legendarneho Nokia modela wuńć.

Porno aktualnym šmóratkam pak maja tute handije lědma lěpšinow: Nječinja žane wysoko kwalitatiwne fota a Youtube, hry, telewiziju na nich hladać njemóžeš. A tež socialne syće kaž Tiktok abo Instagram nimaja. Jeničce akku dźerži dlěje, něhdźe tři do štyri dny. Modele su wot funkcijow potajkim na minimum redukowane. Ale runje to je za mnohich wulki plus. Ma rěkać: telefonować, SMS, mjeztym tež whatsapp a kalender. Wo wjele wjace nic. A to wabi ludźi, kiž chcedźa sej kusk měra wot super smartfonow popřeć, nad kotrymiž nimale 24 hodźinow wisaja...