Nowa KI koncerna Meta: Módry kruh na Whatsapp
Hauptinhalt
10. jutrownika 2025, 10:28 hodź.
Whatsapp je jedna z najhušćišo wužiwanych appow našich šmóratkow, wšako sej tam ludźo wšě móžne wažne a njewažne, směšne a zrudne, trěbne a njetrjebawše powěsće, informacije, wideja a fota sćelu. Zawěsće pak sće to tež jako wužiwarjo hižo wuhladali, pola wjetšiny je tam wot najnowšeho tajki přidatny módry kruh widźeć.
Tutón symbol w formje módreho kruha skiča přistup na swójsku kumštnu inteligencu koncerna META, ke kotrejž nimo whatsapp tež Instagram a Facebook słušatej. KI pomocnikow - tych je poprawom w syći hižo dosć, najznaćiši je ChatGPT, tež Google ma swójsku KI z mjenom Gemini abo tež Copilot firmy Microsoft. Wone funguja zwjetša podobnje: Maš-li prašenje, móžeš je do programčka zapodać a KI wuplunje ći wšě móžne informacije k tomu.
Što mi to konkretnje da, hdyž wužiwam tutu KI we whatsapp?
Tak wjele kaž druhe tež, jenož, zo maš wšo na jednym městnje. Přikład: planuješ w swójbnej skupinje klětuše jutry, njewěš pak, na kotrym dnju jutrońčka klětu budźe - to wjetšina z nas spěšnje googluje - abo emt prašeš so KI. A META wězo chce, zo njewužiwaš KI-pomocnika druhich firmow, ale swójskeho a runje tohodla je tutón módry kruh tež na whatsapp tak prezentnje placěrowany. Štož tuta KI kaž wšě tamne dotal hišće njemóže, je serbsce pisać a čitać.
A hdyž ja to wšo njecham, kak ja tutón módry kruh tam preč dóstanu?
Scyła nic. Módry kruh njehodźi so dotal wotstronić, ale móžeće tutu KI prosće ignorować, jeli jón wužiwać njechaće. Meta znajmjeńša přilubi, zo tuta KI, dalokož so njewužiwa, žane, wosobinske daty a wobsahi Wašich powěsćow we whatsapp njepřehlada a njewužiwa.
Wo tutej temje rozprawja tež němski program MDR. Nadrobniše informacije tule:
